فلسطین کی حمایت میں ایس آئی او تلنگانہ کا چارمینار پراحتجاج،جنگ بندی کا مطالبہ
عام شہریوں سے اسرائیلی مصنوعات کی بائیکاٹ کی اپیل
دعوت ویب ڈیسک
نئی دہلی ،22 اگست :۔
غزہ بحران کے خلاف ہندوستان کے انصاف پسند طبقات اب کھل کر احتجاج کر رہے ہیں ۔آج جس وقت دہلی کے جنتر منتر پر جماعت اسلامی ہند کی قیادت میں متعدد مسلم تنظیموں کی جانب سے مشترکہ علم احتجاج بلند کیا گیا اور غزہ میں اسرائیلی ظلم و بربریت کے خلاف مظاہرہ کیا گیا اسی وقت حیدر آباد کی تاریخی عمارت چار مینار کے سامنے بھی بڑی تعداد میں لوگ اکٹھا ہوئے اور غزہ بحران کے خلاف احتجاج کیا،اسرائیلی بربریت کی مذمت کی گئی اور مظلوم فلسطینیوں کے ساتھ یکجہتی کا اظہار کیا گیا۔
اس احتجاج کا اہتمام تلنگانہ کی اسٹوڈنٹس اسلامک آرگنائزیشن (ایس آئی او) نے کیا تھا اس احتجاج میں اسرائیل کے ذریعہ غزہ میں نسل کشی کی مذمت کی گئی اور بھوک کو بطور ہتھیار استعمال کرنے کے اسرائیلی کوششوں کی مذمت کی گئی ۔شرکاء نے پلے کارڈ اٹھا رکھے تھے اور فوری جنگ بندی، غیر محدود انسانی امداد اور جنگی جرائم کے لیے جوابدہی کا مطالبہ کرتے ہوئے نعرے لگائے۔
اجتماع سے خطاب کرتے ہوئے ایس آئی او تلنگانہ کے ریاستی صدر فراز احمد نے عالمی طاقتوں کی خاموشی پر سخت تنقید کی۔ انہوں نے کہا کہ "حکومت ہند کو مسئلہ فلسطین پر ایک واضح اور اصولی موقف اختیار کرنا چاہیے، ایک آزاد فلسطینی ریاست کے لیے اپنی تاریخی حمایت کی روایت کو بر قرار رکھنا چاہئے۔ ہندوستان سمیت تمام ممالک کو اسرائیل کو ہتھیاروں اور فوجی مدد کی برآمد کو فوری طور پر روک دینا چاہیے۔
فراز احمد نے اس موقع پر شہریوں سے بھی اپنا کردار ادا کرنے کی اپیل کی۔ "عالمی رہنماؤں کو فلسطین کے لیے انسانی امداد کی فوری اور بلا روک ٹوک ترسیل کو یقینی بنانا چاہیے، اور ہندوستانی شہریوں کو بیداری میں اضافے، اسرائیل سے منسلک مصنوعات کا بائیکاٹ کرنے، اور فلسطینی کاز کی ہر ممکن مدد کرتے ہوئے فعال کردار ادا کر نےکی اپیل کی۔ انہوں نے کہا کہ جب غزہ بھوک اور اجتماعی ہلاکتوں کا شکار ہے تو دنیا خاموش نہیں رہ سکتی۔ یہ ہمارا اخلاقی فرض ہے، احتجاج اورمظاہرہ کے ذریعے ہمیں جواب دینا چاہئے ۔