نئی دہلی ،15 اپریل :۔
بی جے پی کی حکمرانی والی ریاستوں میں مساجد اور مسلمانوں کی تعمیرات انہدامی کارروائی کی زد میں ہیں ۔تازہ معاملہ ہریانہ کے فرید آباد کا ہے۔ جہاں ایک علی شان مسجد کو منہدم کر دیا گیا۔انتظامیہ کا دعویٰ ہے کہ یہ مسجد سرکاری زمین پر تعمیر تھی ۔ انہدامی کارروائی کے دوران مقامی لوگوں کے احتجاج سے بچنے کے لیے پولیس کی بڑی تعداد بھی موقع پر موجود تھی۔اطلاع کے مطابق فرید آباد میونسپل کارپوریشن کے عملے نے جو پولیس کی بھاری نفری کے ساتھ پہنچی، نے جمائی کالونی میں سرکاری اراضی پر ناجائز تجاوزات ہٹانے کے لیے کارروائی شروع کردی ہے۔ توڑ پھوڑ کی وجہ سے لوگوں کی بڑی تعداد جمع ہو گئی۔ کارپوریشن کا سکواڈ مسلسل ناجائز تجاوزات ہٹا رہا ہے۔ انتظامیہ کا کہنا ہے کہ میونسپل کارپوریشن کی بلڈوزر کارروائی اس وقت تک جاری رہے گی جب تک سرکاری املاک سے غیر قانونی قبضے نہیں ہٹا دیئے جاتے۔
میڈیا رپورٹوں کے مطابق فرید آباد میونسپل کارپوریشن کے ایس ڈی او سریندر نے کہا کہ جب تک غیر قانونی تجاوزات کو نہیں ہٹایا جاتا، میونسپل کارپوریشن کا دستہ یہاں اپنی کارروائی جاری رکھے گا۔ شہر بھر میں ناجائز قبضے اور تجاوزات ہٹانے کے لیے کارپوریشن کی کارروائی جاری رہے گی۔ فرید آباد سمیت پورے این سی آر میں غیر قانونی تعمیرات اور سرکاری اراضی پر تجاوزات کے خلاف بلڈوزر کی کارروائی مسلسل نظر آرہی ہے۔ کوئی بھی دن ایسا نہیں گزرتا جب این سی آر کے شہروں میں بلڈوزر کی کارروائی نہ ہو۔