غزہ کے ہزاروں بچوں کے کفن پر لکھا ہوا ’نامعلوم بچہ‘ ہمارے ضمیر پر نہ بھرنے والا زخم ہے

دعوت ویب ڈیسک

نئی دہلی ،24اگست :۔

ترکیہ کے صدر رجب طیب اردگان کی اہلیہ اور ترکیہ کی خاتون اول امینہ اردگان نے امریکی صدر ڈونالڈ  ٹرمپ کی اہلیہ میلانیا ٹرمپ کو کہا ہے کہ وہ غزہ میں انسانی بحران کے حوالے سے ویسی ہی حساسیت کا مظاہرہ کریں جیسا کہ وہ یوکرین کی جنگ کے حوالے سے کرتی ہیں۔اس سلسلے میں انہوں نے ٹرمپ کی اہلیہ کو خط لکھا ہے ۔

ترک میڈیا کے مطابق میلانیا ٹرمپ کو لکھے گئے خط میں ترک خاتون اوّل کا کہنا ہے کہ اسرائیلی درندگی کا شکار غزہ بچوں کا قبرستان بن چکا ہے۔ انہوں نے میلانیا ٹرمپ کو لکھے گئے خط میں کہا ہے کہ غزہ کے ہزاروں بچوں کے کفن پر لکھا ہوا ’نامعلوم بچہ‘ ہمارے ضمیر پر نہ بھرنے والا زخم ہے۔ترک خاتون اوّل نے  اپنے خط میں مزید کہا ہے کہ آپ نے یوکرین کے بچوں کی وکالت کی، امید ہے آپ غزہ کے بچوں کے لیے بھی حساسیت کا مظاہرہ کریں گی۔

میڈیا رپورٹوں کے مطابق غزہ میں انسانی بحران کے حوالے سے ترک صدر کی اہلیہ امینہ ایردوان  نے  میلانیہ ٹرمپ کو خط میں لکھا ہے کہ”مجھے یقین ہے کہ جنگ میں 648 یوکرینی  بچوں کے بارے میں آپ نے جس  حساسیت کا مظاہرہ کیا تھا، آپ اس سے بھی بڑھ کر  غزہ کے لیے بھی اس  موقف کا مظاہرہ کریں گی، جہاں دو سالوں میں 62,000 بے گناہ شہری جن میں سے 18,000 بچے تھے، کو بے دردی سے  شہید کر دیا گیا ۔

واضح رہے کہ رجب طیب اردگان کی اہلیہ امینہ  اردگان جذباتی خاتون ہیں ،انسانی ہمدردی اور رحمدلی کا مظاہرہ کر چکی ہیں۔اس سے قبل روہنگیا مسلمانوں کی  بے بسی پر بھی ان کی ویڈیو اور تصاویر وائرل ہوئی تھی جس میں وہ مظلوم مسلمانوں کو گلے لگا کر جذباتی ہو رہی تھیں۔

امینہ اردگان نے مزید لکھا کہ یہ انتہائی معنی خیز ہو گا اگر آپ اسرائیلی وزیر اعظم بنجمن نیتن یاہو کو ایک خط بھیجیں جس میں غزہ میں انسانی بحران کے خاتمے کے لیے آپ کا پرزور مطالبہ شامل ہو۔ ان دنوں جب دنیا ایک اجتماعی بیداری کے عمل سے گزر رہی  ہے اور فلسطین کو تسلیم کرنا ایک عالمی  ذمہ داری  بنتی جا رہی ہے، مجھے یقین ہے کہ غزہ   کے نام پر  آپ کی  اپیل فلسطینی عوام کے لیے  تاریخی ذمہ داری کو پورا کرنے کا وسیلہ بنے گی۔

اپنے خط کا آغاز گرمجوشی اور احترام کے ساتھ کرتے ہوئے امینہ اردگان نے کہا کہ واشنگٹن ڈی سی میں وائٹ ہاؤس میں ملاقات کے دوران میلانیہ ٹرمپ کی گرمجوشی سے گفتگو اور مہمان نوازی چھ سال بعد بھی ان کے ذہن میں تازہ ہے۔