غزہ کے مسئلہ پرسرکردہ مسلم تنظیموں کے مشترکہ وفد کی فرانس کے پولیٹیکل کونسلر زین العابدین سے ملاقات
دعوت ویب ڈیسک
نئی دہلی ،12 اگست :۔
غزہ کے بحران پر ملک کی سر کردہ مسلم تنظیم جماعت اسلامی ہند کی قیادت میں ملک کی ممتازمسلم تنظیموں کے مشترکہ وفد مسلسل متعدد ممالک کے سفرا سے ملاقات کر رہے ہیں اور ان سے غزہ بحران کے خاتمے کے لئے با معنی کردار ادا کرنے کی اپیل کر رہے ہیں۔ اسی سلسلے میں آج ایک بار پھر ممتاز مسلم تنظیموں کے مشترکہ وفد نے ہندوستان میں فرانسیسی سفارت خانے کے پولیٹیکل کونسلر زین العابدین سے ملاقات کی۔
جماعت اسلامی ہند کی ریلیز کے مطابق وفد نے حکومت فرانس سے اپیل کی کہ وہ غزہ کے بحران کے خاتمے کے لیے ٹھوس اور بامعنی کردار ادا کرے۔ ملک کے امن پسند شہریوں اور ہندوستان کی مسلم تنظیموں کی جانب سے سفارت خانے کے ذریعے فرانس کی حکومت سے درج ذیل مطالبات کیے گئے۔
- جاری تشدد پر ایک مضبوط اخلاقی موقف اختیار کریں: ایک عوامی بیان جاری کریں جس میں غزہ میں طاقت کے اندھا دھند استعمال پر شدید تشویش کا اظہار کیا جائے۔
- احتساب کی حمایت: اسرائیلی وزیر اعظم بنجامن نیتن یاہو کے لیے بین الاقوامی فوجداری عدالت کے وارنٹ گرفتاری کی توثیق کریں اور فلسطینی علاقوں پر اسرائیل کے غیر قانونی قبضے کو ختم کرنے کے لیے اقوام متحدہ کی جنرل اسمبلی کے مطالبے کی حمایت کریں۔
- اسرائیل کے ساتھ تعلقات منقطع کریں: اسرائیل کے ساتھ فوجی، اقتصادی اور سفارتی تعلقات اس وقت تک معطل رکھیں جب تک کہ وہ بین الاقوامی قانون کی تعمیل نہیں کرتا اور غزہ میں اپنی جارحیت بند نہیں کرتا۔
- انسانی امداد فراہم کریں: امدادی کوششوں کے لیے خاطر خواہ وسائل فراہم کریں، بشمول اقوام متحدہ کی ریلیف اینڈ ورکس ایجنسی (UNRWA) کے لیے فنڈنگ، اور خوراک، پانی، ایندھن، اور طبی سامان کی فراہمی کے لیے انسانی ہمدردی کی راہداریوں کو فوری طور پر کھولنے کی وکالت کریں۔
- فلسطینیوں کے حقوق اور خود ارادیت کی وکالت: فلسطینی عوام کے اس حق کو برقرار رکھیں، جیسا کہ بین الاقوامی قانون کے تحت تسلیم کیا جاتا ہے، قبضے کے خلاف مزاحمت اور اپنے قانونی طور پر منتخب نمائندوں کے ذریعے اپنے معاملات پر حکومت کرنے، وقار، خودمختاری، اور اپنے مستقبل کا خود تعین کرنے کے حق کو یقینی بنانا شامل ہے۔
ریلیز کے مطابق وفد میں جماعت اسلامی ہند کے امیر سید سعادت اللہ حسینی، ڈاکٹر سید قاسم رسول الیاس ( آل انڈیا مسلم پرسنل لا بورڈ کے ترجمان )، مولانا محمد ندیم صدیقی سلفی (صدر، مرکزی جمعیت اہلحدیث دہلی)، محمد شفیع مدنی (قومی سکریٹری، جماعت اسلامی ہند) انیس الرحمان ( جنرل سکریٹری ایس آئی او آف انڈیا) اور ڈاکٹر رضوان رفیقی (نیشنل اسسٹنٹ سکریٹری، جماعت اسلامی ہند) شامل تھے۔