رپورٹ کے مطابق، نیدرلینڈ میں جنوبی افریقہ کے سفیر ووسیموزی میڈونسیلا نے ججوں کو بتایا کہ ان کے ملک نے دوبارہ آئی سی جے سے رجوع کیا ہے کیونکہ ’’فلسطینی عوام کی تباہی جاری ہے، 35000 لوگ مارے جا چکے ہیں اور غزہ کا بڑا حصہ تباہ ہو کر ملبے میں تبدیل ہو چکا ہے۔‘‘انہوں نے کہا کہ اسرائیل فلسطینیوں کی جان کو جان نہیں سمجھ رہا ہے اور اسی لیے ان کا ملک فلسطینی عوام کے بنیادی حقوق کے تحفظ کے لیے مسلسل اپیل کر رہا ہے۔جنوبی افریقہ نے گزشتہ سال 29 دسمبر کو عالمی عدالت انصاف سے رجوع کیا تھا۔ اس کے بعد، اس نے اس سال فروری اور مارچ میں بھی آئی سی جے سے رابطہ کیا اور اضافی اقدامات کی درخواست کی۔

موجودہ درخواست میں، سفیر میڈونسیلا نے رفح سمیت غزہ کی بگڑتی ہوئی صورتحال پر روشنی ڈالی اور پوری غزہ پٹی سے اسرائیلی افواج کے انخلاء کا حکم جاری کرنے کا مطالبہ کیا۔ جنوبی افریقہ نے اسرائیل سے غزہ میں اقوام متحدہ اور انسانی امداد کے اداروں کے لیے بلا روک ٹوک رسائی کا بھی مطالبہ کیا ہے۔ اسرائیل کو جمعہ کو اپنا مقدمہ پیش کرنے کا موقع ملے گا۔ کیس کا فیصلہ آنے والے ہفتوں میں متوقع ہے۔