غزہ سے فلسطینیوں کی جبری نقل مکانی عالمی قوانین، انسانی اصولوں اور بنیادی اقدار کی کھلی خلاف ورزی

دعوت ویب ڈیسک

غزہ ،06 ستمبر :۔

غزہ میں اسرائیلی ظلم و بربریت اب انتہا کو پہنچ چکی ہے ،لاکھوں کی تعداد میں معصوم بچے اور خواتین بھکمری کا شکار ہیں ۔امدادی کارروائیاں اسرائیلی فوج کی ناکہ بندی کی وجہ سے مسدود ہو گئی ہیں۔اب بے یار و مددگار کسمپرسی کی زندگی گزار رہے فلسطینیوں سے ان کی زمین چھیننے کی کوشش کی جا رہی ہے ۔اسرائیلی وزیر اعظم نتن یاہو کے ذریعہ غزہ سے فلسطینیوں کی جبراً نقل مکانی کے منصوبے  کے ہر طرف مذمت کی جا رہی ہے ۔دریں اثنا سعودی عرب،مصر اور قطر نے نتن یاہو کے بے دخلی کے منصوبے کی شدید الفاظ میں مذمت کرتے ہوئے مسترد کر دیا ہے ۔

سعودی وزارت خارجہ کے بیان کے مطابق یہ اقدام عالمی قوانین، انسانی اصولوں اور بنیادی اقدار کی کھلی خلاف ورزی ہے۔ سعودی عرب نے اس موقع پر مصر کے ساتھ اپنے مکمل تعاون اور یکجہتی کا بھی اظہار کیا۔مملکت نے زور دیا کہ عالمی برادری خصوصاً سلامتی کونسل کے مستقل ارکان کو چاہیے کہ وہ فلسطینی عوام اور ان کی سرزمین کے خلاف جاری اسرائیلی جارحانہ پالیسیوں کو روکنے کے لیے فوری کردار ادا کریں اور یہ واضح کیا کہ کسی بھی صورت میں فلسطینیوں کی جبری ہجرت قبول نہیں کی جائے گی۔ سعودی عرب نے ایک بار پھر مطالبہ کیا کہ قابض اسرائیل کو فلسطینی شہریوں کے خلاف نسل کشی اور سنگین مظالم پر جواب دہ ٹھہرایا جائے۔ سعودی عرب نے اس بات پر بھی زور دیا کہ فوری طور پر ان جرائم کو روکا جائے، فلسطینی عوام کو تحفظ فراہم کیا جائے اور ان کے جائز حقوق تسلیم کیے جائیں، جن میں سنہ1967ء کی سرحدوں کے مطابق آزاد فلسطینی ریاست کا قیام اور مشرقی یروشلم کو اس کا دارالحکومت تسلیم کرنا شامل ہے۔ خطے میں دیر پا امن کے لیے مسئلہ فلسطین کا منصفانہ حل ضروری ہے۔

قطر کی وزارت خارجہ نے بھی نیتن یاہو کے ریمارکس پر شدید تنقید کرتے ہوئے انہیں "برادر فلسطینی عوام کے حقوق کی خلاف ورزی کے لیے قبضے کے طریقہ کار میں توسیع” قرار دیا۔قطر نے ایک بیان میں کہا، "فلسطینیوں کے خلاف قبضے  کے ذریعہ اجتماعی سزا کی پالیسی… فلسطینی عوام کو اپنی سرزمین چھوڑنے پر مجبور کرنے یا ان کے جائز حقوق غصب کرنے میں کامیاب نہیں ہو گی۔

اس  نے بین الاقوامی برادری   پر زور دیا گیا کہ وہ "اسرائیلی قبضے کی انتہا پسندانہ اور اشتعال انگیز پالیسیوں کا مقابلہ کرنے کے لیے عزم کے ساتھ متحد ہو، تاکہ خطے میں تشدد کے سلسلے کو جاری رکھنے اور اسے دنیا میں پھیلنے سے روکا جا سکے۔

دریں اثنا مصری وزیر خارجہ نے ایک بیان میں زور دے کر کہا ہے کہ اسرائیلی ریاست کی طرف سے بے گھر کر کے غزہ سے فلسطینیوں کی جانے والی جبری نقل مکانی برداشت نہیں کی جائے گی۔ انہوں نے غزہ میں فلسطینیوں کی ہزاروں کی تعداد ہو چکی ہلاکتوں کو نسل کشی قرار دیا۔

مصری وزیر خارجہ بدر عبدالطی نے نکوسیا میں رپورٹرز سے گفتگو کرتے ہوئے کہا اس جبری نقل مکانی کا مطلب ہوگا کہ فلسطین کاز کو مکمل تحلیل کرنے کی سازش کی جا رہی ہے۔ اس منصوبے کی کوئی اخلاقی گنجائش ہے نہ قانونی اور نہ ہی نسلی بنیادوں پر ایسا کیا جا سکتا ہے۔ کہ ان لوگوں کو اپنے گھروں اور وطن سے نکال دیا جائے جو اس کے مالک ہیں۔