ضمانت کی عرضی خارج ہونے کے بعد شرجیل امام نے سپریم کورٹ کا کیا رخ

نئی دہلی ،07 ستمبر :۔

عمر خالد اور شرجیل امام کے ساتھ  2020 میں ہوئے فرقہ وارانہ فسادات کے ملزمین بغیر کسی ضمانت کے گزشتہ پانچ برسوں سے جیل میں ہیں ۔حالیہ دنوں میں دہلی ہائی کورٹ نے ایک بار پھر ان کی ضمانت کی عرضی خارج کر دی ۔ضمانت کی عرضی خارج کا معاملہ اس وقت سرخیوں میں ہے۔دریں اثنا  شرجیل امام نے ہفتہ (6 اگست) کو سپریم کورٹ کا رخ کیا ہے۔   یہ معاملہ شہریت ترمیمی قانون (سی اے اے) اور نیشنل رجسٹر آف سٹیزن (این آر سی) کے خلاف شمال مشرقی دہلی میں ہوئے مظاہرے کے دوران پیش آئے فسادات سے متعلق ہے۔ شرجیل امام پر الزام ہے کہ وہ فساد کی سازش کرنے والوں میں سے ایک ہیں۔

استغاثہ نے عدالت میں کہا کہ یہ فساد اچانک نہیں ہوا تھا، بلکہ اس کی منصوبہ بندی پہلے سے کی گئی تھی۔ ساتھ ہی انہوں نے بتایا تھا کہ یہ ایک خطرناک سازش تھی اور اسے سوچ سمجھ کر انجام دیا گیا تھا۔

قابل ذکر ہے کہ شرجیل امام، عمر خالد سمیت دیگر پر غیر قانونی سرگرمیاں (روک تھام) ایکٹ (یو اے پی اے) اور تعزیرات ہند (آئی پی سی) کے تحت الزام عائد کیے گئے ہیں۔ ان پر فساد کے ’ماسٹر مائنڈ‘ ہونے کا الزام ہے۔ اس فساد میں 53 لوگوں کی موت ہوئی تھی اور 700 سے زائد افراد زخمی ہوئے تھے۔