سنبھل  رپورٹ :یوپی حکومت جھوٹے اعدادوشمار دے کر خوف  کا نظریہ قائم کرنے کی کوشش کر رہی ہے: جاوید علی خان

نئی دہلی ،30 اگست :۔

مغربی یوپی کا سنبھل شاہی جامع مسجد پر مندر تنازعہ کے بعد مسلسل سرخیوں میں ہے اور سنبھل کو ایک طرح سے یوگی حکومت   اپنے ایجنڈے کے طور پر  استعمال کر رہی ہے ۔اب ایک بار پھر سنبھل بحث میں ہے ۔حکومت کو سنبھل پر سونپی گئی حالیہ رپورٹ میں دعویٰ کیا گیا ہے کہ سنبھل میں مسلسل ہندو اقلیت میں ہو تے جا رہے ہیں اس کے پس پردہ دعویٰ کیا جا رہا ہے کہ غیر قانونی تبدیلی مذہب کار فرما ہے حالانکہ اس رپورٹ کو اعداد شمار کی بنیاد پر غلط بتایا جا رہا ہے ۔ اس سلسلے میں رکن پارلیمنٹ جاوید علی نے مرد شماری کے اعداد شمار کی روشنی میں رپورٹ میں کئے گئے دعوؤں کو جھوٹا قرار دیا ہے ۔ انہوں نے ایک پر حساب کتاب شیئر کرتے ہوئے لکھا کہ   1951 کی مردم شماری کے مطابق سنبھل کے شہری علاقے کی آبادی 61568 تھی جس میں مسلمانوں کی تعداد 43667 یا تقریباً 71% اور ہندوؤں کی تعداد 17901 یا تقریباً 29% تھی۔

2011 کی مردم شماری کے مطابق سنبھل شہری علاقے کی آبادی 220813 تھی جس میں مسلمانوں کی تعداد 171514 یا تقریباً 78% اور ہندوؤں کی تعداد 48581 یا تقریباً 22% تھی۔

انہوں نے مزید کہا کہ 1951 اور 2011 کی مردم شماری کے وقت، سنبھل ضلع مراد آباد کا ایک حصہ تھا۔ 2021 کی مردم شماری کورونا کی وجہ سے مکمل نہیں ہو سکی جو کہ اب 2027 میں تجویز کی گئی ہے، اس لیے تازہ ترین اعداد و شمار 2028 کے آخر تک دستیاب ہوں گے۔

1951 سے 2011 تک مسلمانوں کی آبادی میں 7% کا اضافہ ہوا جس کی بنیادی وجہ یہ ہے کہ روزگار اور بہتر تعلیم کی خواہش نے آس پاس کے دیہی علاقوں سے مسلمانوں کو سنبھل شہر کی طرف کھینچا اور اس سے بھی بڑھ کر 1986 میں میونسپل علاقے کی حد بندی ہوئی جس کے ذریعے شہر کے آس پاس کے کچھ گاؤں میونسپل ایریا میں شامل ہوئے۔ اس کا مطلب ہے کہ تناسب ایک ہی رہا ہے۔

انہوں نے کہا کہ آج اتر پردیش کی حکومت نے جھوٹے اعدادوشمار دے کر خوف کی وجہ سے مذہب تبدیلی اور ہجرت کا نظریہ قائم کرنے کی کوشش کی ہے کہ سنبھل میں ہندوؤں کی تعداد میں 30% کمی آئی ہے۔انہوں نے کہا کہ اس جھوٹے دعوے کے ذریعہ  پوری ریاست میں ایک بار پھر ہندو مسلم پولرائزیشن کی مہم زور و شور سے چلائی جا سکے۔  سنبھل کی حقیقت 1951 اور 2011 کی مردم شماری کے اعداد و شمار کو دیکھ کر ہی سمجھی جا سکتی ہے۔ سنبھل میں ہر الیکشن میں بی جے پی کی ہار کے بڑھتے ہوئے مارجن سے حکومت کو سنبھل کے تئیں دشمنی کا احساس ہے۔