سخت سیکورٹی کے باوجود سنبھل اور علی گڑھ میں شرپسندوں نے مساجد کے تقدس کو پامال کرنے کی کوشش کی
سنبھل میں مسجد پر ‘جے شری رام’ لکھ دیا گیا، مسجد انتظامیہ نے پولیس میں شکایت درج کرائی ،علی گڑھ میں ترپال سے ڈھکنے کے باوجود مسجد پر رنگ پھینکا گیا،اور قابل اعتراض گانے بجائے گئے
نئی دہلی ،15 مارچ :۔
اتر پردیش میں ہولی اور جمعہ ایک ہی دن ہونے کی وجہ سے سیکورٹی سخت رہی اور جگہ جگہ پولیس اہلکار تعینات رہے، یہاں تک کہ مساجد کو ترپالوں سے ڈھک دیا گیا اس کے باوجود کچھ شر پسندوں نے مساجد کی توہین کرنے کی کوشش کی اور ہولی کے رنگ مسجد پر پھینکے ۔سنبھل میں ترپال سے کور کرنے کے باوجود شر پسندوں نے ترپال کھینچا اور مسجد پر رنگ ڈالنے کی کوشش کی ۔ایک مسجد کی دیوار پر جے شری رام بھی لکھ دیا۔اسی طرح علی گڑھ کی عبد الکریم مسجد کے سامنے شر پسندوں نے ہولی کے جلوس کے دوران قابل اعتراض گانے بجائے اور مسلمانوں کو گالیاں دیں مسجد پر رنگ پھینکنے کی کوشش کی ۔
رپورٹ کے مطابق سخت سیکورٹی کے باوجود شرارتی افراد ہولی کی تقریبات کے دوران مساجد کو نشانہ بناتے ہوئے فرقہ وارانہ انتشار پیدا کرنے میں کامیاب ہو گئے۔ جہاں سنبھل کی ایک مسجد پر جئے شری رام کا پینٹ کیا گیا تھا، وہیں دوسری مسجد پر رنگ پھینکنے کی کوشش کی گئی تھی جو مسجد کے تقدس کو یقینی بنانے کے لیے ترپال سے ڈھکی ہوئی تھی۔ریاست میں ہولی کے پرامن جلوسوں کے دعووں کے باوجود یہ واقعات سامنے آ ئے ہیں۔
14 مارچ جمعہ کو ہولی کے دوران کچھ لڑکوں کے ایک گروپ نے مبینہ طور پر رنگوں کا چھڑکاؤ کیا اور فرقہ وارانہ طور پر حساس سنبھل ضلع میں ایک مسجد کے دروازے پر "جئے شری رام” لکھا۔
رپورٹ کے مطابق مسجد کمیٹی نے حیات نگر پولیس اسٹیشن میں شکایت درج کرائی، جس میں الزام لگایا گیا کہ ویریش، برجیش، ستیش، ہرسوروپ، شیوم اور ونود نامی ملزمان نے مسجد کے اندر رنگ بھی پھینکے۔اسی طرح کے ایک واقعے میں، یوپی کے علی گڑھ میں، عبدالکریم چوک میں عبدالکریم مسجد کے باہر جلوس کے ساتھ ہولی منانے والے ایک گروپ نے ہولی کے لیے ترپال سے ڈھانپنے کے باوجود مسجد پر رنگ پھینکنے کی کوشش کی اور مسجد کے تقدس کو پامال کرنے کی کوشش کی ۔
ہجوم نے اشتعال انگیز گانوں پر رقص اور گانا بھی گایا جبکہ بلند آواز سے فرقہ وارانہ نعرے لگائے، جان بوجھ کر علاقے میں کشیدگی کو ہوا دی۔ اس سلسلے میں سیکورٹی انتظامیہ کی جانب سے کسی طرح کی کارروائی کی اب تک کوئی اطلاع نہیں ہے۔ حالانکہ سنبھل میں مسجد کی دیوار پر جے شری رام کے نعرے لکھے جانے کی شکایت مسجد انتظامیہ کے لوگو ں نے پولیس میں کی ہے۔