راجستھان: اسکولوں میں سوریہ نمسکار کو لازمی قرار دینے کیخلاف مسلم تنظیموں کا احتجاج

نئی دہلی،02 فروری :۔

راجستھان میں بھارتیہ جنتا پارٹی کی حکومت کے 3 فروری کو سوریہ سپتمی کے موقع پر تمام اسکولوں میں ‘سوریہ نمسکار’ کو لازمی قرار دینے کے فیصلے نے ایک بڑا تنازعہ کھڑا کر دیا ہے۔ گزشتہ تعلیمی سیشن میں اسی طرح کا حکم نافذ کرنے کے بعد، بی جے پی حکومت کا مقصد گزشتہ سال 78,974 اسکولوں میں 1.33 کروڑ طلباء کے ذریعہ قائم کردہ عالمی ریکارڈ کو توڑنے کا ہے۔

ریاستی وزیر تعلیم مدن دلاور، جو اپنے شدت پسند ہندوتوا خیالات کے لیے جانے جاتے ہیں، نے اعلان کیا ہے کہ تمام سرکاری اور غیر سرکاری اسکولوں میں ایک ساتھ سوریہ نمسکار ادا کیا جائے گا۔ انہوں نے کہا کہ سوریہ نمسکار ہندوستانی روایات کا ایک اہم حصہ ہے اور اسے ہر روز کرنے سے جسم صحت مند اور دماغ پرسکون رہتا ہے۔ انہوں نے عوام سے اپیل کی کہ وہ اس ایونٹ کا حصہ بنیں تاکہ ایک بار پھر عالمی ریکارڈ بنایا جا سکے۔

ریاستی حکومت نے راشٹریہ سویم سیوک سنگھ سے وابستہ تنظیم کریدا بھارتی کے ماہرین کو مدعو کیا ہے اور انہیں پروگرام میں شامل کیا ہے۔ یہ ماہرین سوریہ نمسکار کی اہمیت کو اجاگر کرنے کے لیے تمام تعلیمی اداروں کے ساتھ تعاون کریں گے اور اسکولوں کا دورہ کریں گے اور اس رسم میں شامل یوگا کی تمام حرکات کی بھی وضاحت کریں گے۔

دلاور نے کہا کہ کرڈا بھارتی کے ماہرین روزانہ کی دعائیہ میٹنگ اور سوریہ سپتمی کے موقع پر سوریہ نمسکار کی مشق کرنے میں تمام اسکولوں کے پرنسپلوں کی رہنمائی کریں گے۔

حکومت کے اس متعصبانہ  اور مسلم مخالف فیصلہ پر ریاست کے تمام مسلم گروپوں کی نمائندہ تنظیم راجستھان مسلم فورم نے سوریہ نمسکار کو لازمی طور پر نافذ کرنے پر سخت اعتراض ظاہر کیا ہے۔ مسلم فورم نے محکمہ تعلیم کے حکم نامے کو فوری واپس لینے کا مطالبہ کرتے ہوئے کہا کہ ورزش کے نام پر تعلیمی اداروں میں دوسرے مذاہب کے ماننے والوں پر کسی مخصوص ثقافت کی رسم و رواج کو مسلط نہیں کیا جا سکتا، یہ مذہبی آزادی کی کھلی خلاف ورزی ہے۔

مسلم فورم کے جنرل سکریٹری اور جماعت اسلامی ہند کی راجستھان یونٹ کے صدر محمد ناظم الدین نے جے پور میں ایک پریس کانفرنس میں کہا کہ بی جے پی حکومت کی ایک مخصوص مذہب کے عقائد کو دوسرے مذہب کے ماننے والوں پر مسلط کرنے کی کوشش ہے۔ ایک سیکولر اور جمہوری ملک قابل نفرت اقدام ہے اور شہریوں کے بنیادی حقوق پر حملہ ہے۔

فورم کے جنرل سکریٹری ناظم الدین نے کہا کہ یہ عجیب بات ہے کہ تعلیم کے معیار میں ریکارڈ بنانے کے بجائے راجستھان حکومت سوریہ نمسکار میں عالمی ریکارڈ بنانے کی دوڑ میں لگی ہوئی ہے۔ اگر حکومت واقعی کوئی ریکارڈ بنانا چاہتی ہے تو اسے تعلیم کے میدان میں سرفہرست رہنے اور اسکولوں میں بنیادی سہولیات فراہم کرکے ایسا کرنا چاہیے۔

انہوں نے کہا کہ ریاست کے بہت سے اسکولوں میں اب بھی کافی اساتذہ نہیں ہیں اور نہ ہی عمارتیں، پینے کا صاف پانی، طلباء کے لیے بیت الخلا اور کلاس رومز میں بیٹھنے کے لیے فرنیچر نہیں ہے۔محمد ناظم الدین نے کہا کہ ان تمام مسائل پر فوری توجہ کی ضرورت ہے، اس لیے ریاستی حکومت کو مذہبی سرگرمیوں کو فروغ دینے کے بجائے تعلیمی انفراسٹرکچر کو مضبوط بنانے پر توجہ دینی چاہیے۔