دہلی ہائی کورٹ نے عمر خالد، شرجیل امام اور 7 دیگر کوضمانت دینے سے انکار کر دیا
2020 دہلی فسادات میں سازش کےالزام کے تحت پانچ برسوں سے جیل میں ہیں،ملزمان کے وکلا نے کہا کہ وہ اس حکم کے خلاف سپریم کورٹ جائیں گے
دعوت ویب ڈیسک
نئی دہلی ،02 اگست :۔
دہلی ہائی کورٹ نے منگل کو جے این یو کے سابق طلباء اور کارکنان عمر خالد اور شرجیل امام سمیت سات دیگر کو ضانت دینے سے انکار کر دیا اور درخواستیں مسترد کر دیں۔خیال رہے کہ ان تمام پر 2020 میں دہلی فسادات کی سازش کا الزام ہے۔
رپورٹ کے مطابق جسٹس نوین چاولہ اور جسٹس شلندر کور پر مشتمل بنچ نے عمر خالد، شرجیل امام، محمد سلیم خان، شفا الرحمان، اطہر خان، میران حیدر، شاداب احمد، خالد سیفی اور گلفشاں فاطمہ کی ضمانت کی درخواستیں خارج کر دیں۔ خالد اور امام کی درخواست ضمانت 2022 سے زیر التوا تھی۔ ملزمان کے وکلاء نے کہا کہ وہ اس حکم کے خلاف سپریم کورٹ جائیں گے۔
کارکنان پر غیر قانونی سرگرمیاں (روک تھام) ایکٹ (یو اے پی اے) کے تحت الزام عائد کیا گیا ہے کہ وہ ایک "بڑی سازش” کا حصہ ہیں جس کی وجہ سے فروری 2020 میں شمال مشرقی دہلی میں شہریت ترمیمی قانون (سی اے اے) کے خلاف مظاہروں کے دوران فرقہ وارانہ تشدد ہوا تھا۔ فسادات میں 50 سے زائد افراد ہلاک اور 700 سے زائد زخمی ہوئے۔
دہلی پولیس نے عمرخالد، شرجیل امام اور دیگر کو تشدد کا ماسٹر مائنڈ قرار دیا ہے۔ خالد ستمبر 2020 سے جیل میں ہیں۔ انہیں گزشتہ دسمبر میں خاندانی شادی میں شرکت کے لیے سات دن کی عبوری ضمانت دی گئی تھی۔ امام کو اس سے قبل 2020 میں گرفتار کیا گیا تھا۔
سماعت کے دوران، کارکنوں کے وکلاء نے دلیل دی کہ وہ پہلے ہی چار سال سے زیادہ عرصہ بغیر مقدمہ چلائے حراست میں گزار چکے ہیں۔ عمر خالد نے عدالت کو بتایا کہ شریک ملزمان کے ساتھ واٹس ایپ گروپس کا حصہ بننا جرم کے مترادف نہیں ہے، اور انہوں نے نشاندہی کی کہ اس سے کبھی کوئی مجرمانہ مواد یا رقم برآمد نہیں ہوئی۔ امام نے استدلال کیا کہ وہ خالد یا دوسرے ملزم سے رابطے میں نہیں تھا اور نہ ہی ان کی تقریروں اور نہ ہی چیٹس سے تشدد کا اشارہ ملاتا ہے۔
سالیسٹر جنرل تشار مہتا، استغاثہ کی طرف سے پیش ہوئے، نے ضمانت کی درخواستوں کی مخالفت کی۔ انہوں نے استدلال کیا کہ یہ فسادات "ایک سوچی سمجھی سازش” تھی جسے بین الاقوامی سطح پر ہندوستان کو بدنام کرنے کے "مذموم مقصد” کے ساتھ ڈیزائن کیا گیا تھا۔ مہتا نے کہا، ’’اگر آپ اپنی قوم کے خلاف کچھ کرتے ہیں تو بہتر ہے کہ آپ جیل میں ہی رہیں جب تک آپ کو بری نہیں کر دیا جاتا۔‘‘اس سے قبل ہائی کورٹ کی ایک علاحدہ بینچ نے اسی کیس کے ایک اور ملزم تسلیم احمد کی درخواست ضمانت بھی مسترد کر دی تھی۔