نئی دہلی، فروری 26— وزیر اعظم نریندر مودی نے بدھ کے روز "امن اور بھائی چارے” کی اپیل کی کیونکہ شمال مشرقی دہلی میں تین روز کے خوفناک تشدد میں بدھ کی شام تک ہلاکتوں کی تعداد27 ہوگئی۔ تشدد میں 200 سے زائد زخمی اور درجنوں دکانیں، مکانات اور گاڑیوں کو نذر آتش کیا گیا۔
بدھ کی سہ پہر وزیر اعظم نے ایک ٹویٹ میں کہا ’’امن اور ہم آہنگی ہمارے اخلاق میں مرکزی حیثیت رکھتی ہے۔ میں اپنی بہنوں اور دہلی کے بھائیوں سے ہر وقت امن اور بھائی چارے کو برقرار رکھنے کی اپیل کرتا ہوں۔ یہ ضروری ہے کہ جلد سے جلد ہی سکون ہو اور معمول کو بحال کیا جائے۔‘‘
منگل کی دیر رات کرفیو نافذ ہونے کے بعد سے متاثرہ علاقوں سے تشدد کی کوئی اطلاع نہیں ہے اور مزید سیکیورٹی اہلکار تعینات کردیے گئے ہیں۔ قومی سلامتی کے مشیر اجیت ڈووال نے منگل کی دیر رات تشدد سے متاثرہ شمال مشرقی دہلی کا دورہ کیا۔
وزیر اعظم مودی نے یہ بھی کہا کہ انھوں نے ’’دہلی کے مختلف علاقوں میں پائے جانے والی صورت حال کا ایک وسیع جائزہ لیا۔ پولیس اور دیگر ایجنسیاں امن اور معمول کو یقینی بنانے کے لیے زمین پر کام کر رہی ہیں۔‘‘
قومی دارالحکومت میں بڑے پیمانے پر تشدد پر وزیر اعظم کا یہ پہلا عوامی رد عمل تھا۔