درگاڈی قلعہ میں مسجد کا  دعوی  سیشن کورٹ سے خارج ، عدالت  نے مندرقرار دیا

نئی دہلی ،11 دسمبر :۔

قدیم مساجد اور درگاہوں میں مندر کی تلاشی مہم کے درمیان مہاراشٹر کی ایک سیشن عدالت نے درگاڈی قلعے کے اندر مسجد کا دعوی کرنے والی عرضی کو خارج کر دیا ہے ۔ اپنے فیصلے میں عدالت نے کہا کہ درگاڈی قلعے پر ایک مندر ہے اور یہ قلعہ حکومت کے ماتحت رہے گا ۔ یہ مقدمہ گزشتہ 48 سالوں سے زیر التوا ہے ۔ عدالت کے فیصلے کے بعد ، ہندو تنظیموں اور شیو سینا کے کارکنوں نے کلیان درگاڈی قلعے میں دیوی درگا کی آرتی کر کے جشن منایا ۔

رپورٹ کے مطابق  کلیان کی عدالت نے 10 دسمبر کو ضلع کے درگاڈی قلعے کے اندر مسجد کی ملکیت کا دعوی کرنے والی عرضی کو خارج کر دیا ۔ کلیان ضلع اور سیشن جج اے ایس لانجیوار نے درگاڈی قلعے پر مندر کے دعوے کو قبول کر لیا ۔ عدالت نے دوسرے مذاہب کے مقدمے کو وقف بورڈ کو منتقل کرنے کے دعوے کو مسترد کر دیا ہے ۔

قلعہ کے اندر مسجد اور عیدگاہ پر قانونی جنگ 1976 سے جاری تھی ۔ یہ مقدمہ مجلس مشاورین مجید ٹرسٹ نے دائر کیا تھا ۔ دونوں برادریوں کے درمیان گزشتہ 48 سالوں سے عدالتی جنگ چل رہی تھی ۔ یہ مقدمہ پہلے تھانے ضلع عدالت میں زیر التوا تھا ۔ بعد میں یہ مقدمہ ڈسٹرکٹ اینڈ سیشن کورٹ میں منتقل کر دیا گیا ۔ معاملے میں درخواست گزار اور ہندو فورم کے صدر دنیش دیشمکھ نے کہا کہ 1971 میں تھانے ضلع کلکٹر نے اعلان کیا تھا کہ درگاڈی قلعے میں ایک مندر ہے ۔

اس فیصلے کے بعد کلیان کی سکیورٹی میں اضافہ کر دیا گیا

کلیان کے ڈپٹی کمشنر آف پولیس اٹل جھنڈے نے کہا کہ فیصلے کے بعد احتیاطی اقدام کے طور پر کلیان کی سکیورٹی بڑھا دی گئی ہے ۔ "ہم نے سیکورٹی کے پیش نظر پورے کلیان میں پولیس بندوبست بڑھا دی ہے ۔ کسی بھی ناخوشگوار واقعے سے بچنے کے لیے سخت حفاظتی انتظامات کیے گئے ہیں ۔ ہر طرف امن ہے ۔ ہم لوگوں سے اپیل کرتے ہیں کہ وہ کسی افواہ پر یقین نہ کریں ۔