جے پور کالج میں 100 سال پرانے مقبروں  کے خلاف ہندوتو گروپ سر گرم،  منہدم کرنے کا مطالبہ

نئی دہلی ، جے پور،06 جولائی :۔

بھارتیہ جنتا پارٹی کی حکومت والی راجستھان میں ہندوتوا عناصر نے جے پور کے مہارانی گرلز کالج میں مقبروں کی موجودگی پر ایک نیا تنازعہ کھڑا کرنے کی کوشش کی ہے۔ مہارانی گرلز کالج راجستھان یونیورسٹی کا ایک  ملحق کالج ہے۔ کالج کی اراضی کے پیچھے پچھلے 100 سالوں سے موجود تین مقبرے  کو اچانک دریافت کا دعوی کرتے ہوئے   انہیں گرانے کا مطالبہ کیا گیا۔ راشٹریہ سویم سیوک سنگھ (آر ایس ایس) سے وابستہ مقامی سماجی اور سیاسی گروپوں کے ساتھ ساتھ بی جے پی کے ایم ایل ایز نے تاریخی دستاویزات اور ریاستی حکومت کے محکمہ آثار قدیمہ کے سروے کی مدد سے معاملے کی تحقیقات کے لیے ایک کمیٹی بنانے کے لیے ضلع انتظامیہ پر دباؤ ڈالا ہے۔

واضح رہے کہ تمام بی جے پی کے زیر اقتدار ریاستوں میں مسلمانوں کے مذہبی مقامات کو نشانہ بنانے کے درمیان پارکوٹا کنزرویشن کمیٹی نامی ایک نئے گروپ نے الزام لگایا ہے کہ جے پور میں سرکاری زمینوں پر قبضہ کرنے کے لیے ’’لینڈ جہاد‘‘ جاری ہے۔ جے پور کے کشن پول حلقے سے کانگریس کے ایم ایل اے امین کاغذی  نے جے پور کے کلکٹر جتیندر سونی سے بھی رابطہ کیا ہے تاکہ قبروں میں دفن  شخصیات  کے وارثین کی مدد کی جا سکے۔

مزاروں پر روزانہ  فاتحہ خوانی کے باوجود  وارثین نے ایک صدی سے زیادہ پرانے زمین کے دستاویزات جمع کرائے مگردائیں بازو کے گروہ ‘مزاروں’ کو گرانے کا مطالبہ کر رہے ہیں اور دعویٰ کر رہے ہیں کہ یہ غیر قانونی تعمیرات ہیں۔ دوسری جانب  وارثین میں شامل زینت خان اور نواب خان نے دعویٰ کیا ہے کہ یہ جگہ نسلوں سے زیارت اور عبادت کی جگہ رہی ہے۔

نواب خان نے کہا کہ یہ درگاہ ہمارے آباؤ اجداد کی ہے اور 100 سال سے زیادہ پرانی ہے۔ ہم یہاں باقاعدگی سے آتے ہیں اور سالانہ عرس بھی منعقد کرتے ہیں۔ خاندان نے جے پور کلکٹر کو تاریخی اراضی کا ریکارڈ بھی جمع کرایا ہے۔ ان کے مطابق مہارانی کالج جس زمین پر بنا ہے اس کا ایک حصہ کالج کی تعمیر شروع ہونے سے پہلے ہی ان کے خاندان سے لیا گیا تھا۔ بدلے میں، حکام نے گاندھی نگر ریلوے اسٹیشن کے قریب متبادل زمین فراہم کرنے کا وعدہ کیا تھا، جو اس وقت شہر کے مضافات میں واقع تھا۔ لیکن وعدہ کبھی پورا نہیں ہوا۔ زینت خان نے کہا، "ہم نے تمام قانونی دستاویزات فراہم کر دی ہیں، بشمول زمین کے ریکارڈ جو کہ کالج کی تعمیر سے پہلے ہمارے خاندان کی ملکیت کو ظاہر کرتے ہیں۔ ثبوتوں کے باوجود، پارکوٹا کنزرویشن کمیٹی نے مزارات کو گرانے کے اپنے مطالبے کو تیز کر دیا ہے، اور اسے "لینڈ جہاد” کی مثال قرار دیتے ہوئے مسلمانوں پر مذہبی مقصد کے لیے زمین پر قبضہ کرنے کا الزام لگایا ہے۔ کمیٹی کے چیئرمین بھرت شرما نے اشتعال انگیز  تبصرے کیے، اور الزام لگایا کہ یہ "منصوبہ بند لینڈ جہاد” ہے۔ شرما نے کہا، "یہ ایمان کے بارے میں نہیں ہے… ہم جے پور کے ورثے سے سمجھوتہ نہیں ہونے دیں گے۔

شرما کے  تبصرے سے مسلمانوں  اور سیکولر تنظیموں میں غم و غصہ پھیل گیا ہے، جبکہ کلکٹر سونی نے چھ رکنی انکوائری کمیٹی تشکیل دینے کا حکم دیا ہے۔ انہوں نے کہا، "ہم معاملے کو سنجیدگی اور حساسیت کے ساتھ دیکھ رہے ہیں۔ کمیٹی زمینی ریکارڈ، تاریخی موجودگی اور دونوں فریقوں کے دعوؤں کا جائزہ لے گی۔

اس کمیٹی میں جے پور کے سب ڈویژنل مجسٹریٹ راجیش جاکھڑ، ڈپٹی کمشنر پریاورت چرن، اسسٹنٹ ڈپٹی کمشنر آف پولیس بلرام جاٹ، آثار قدیمہ کے سپرنٹنڈنٹ نیرج ترپاٹھی اور راجستھان یونیورسٹی کے ایگزیکٹو انجینئر سبھاش بیروا شامل ہیں۔ مہارانی کالج کی پرنسپل پائل لودھا کو بھی کمیٹی کا رکن بنایا گیا ہے۔ کمیٹی کو چار روز میں رپورٹ پیش کرنے کی ہدایت کی گئی ہے۔ تحقیقات کلوز سرکٹ ٹیلی ویژن (سی سی ٹی وی) فوٹیج، سابق ملازمین کے بیانات اور فی الحال کالج میں زیر تعلیم طلباء کی گواہی پر مبنی ہوگی۔

مقامی میڈیا سے بات کرتے ہوئے، پرنسپل لودھا نے کہا کہ ‘مزاروں’ کو کئی سال پہلے بنایا گیا تھا، ان کا دور شروع ہونے سے پہلے۔ انہوں نے کہا کہ حالیہ دنوں میں کوئی بھی کالج کے محفوظ احاطے میں ڈھانچے کی تعمیر کے لیے داخل نہیں ہو سکا ہے اور یقین دلایا کہ مقبروں سے کوئی سیکورٹی خطرہ نہیں ہے۔ ایم ایل اے امین کاغذی نے کہا کہ مذہبی مقامات کو سیاسی فائدے کے لیے نشانہ بنایا جا رہا ہے جو سماجی ہم آہنگی کے لیے خطرناک ہے۔ انہوں نے مطالبہ کیا کہ تاریخی اور مذہبی مقامات کو احترام کے ساتھ محفوظ کیا جائے اور حقائق کی تصدیق کیے بغیر کوئی کارروائی نہ کی جائے، جبکہ راجستھان میں دیگر مسلم گروپوں نے ریاستی حکومت سے قانون کی حکمرانی اور آئینی حقوق کو برقرار رکھنے کو یقینی بنانے کی اپیل کی ہے۔

جے پور کا تنازع بی جے پی کی حکومت والی کئی ریاستوں میں مذہبی تناؤ کے وسیع پس منظر میں سامنے آیا ہے۔ حالیہ برسوں میں اتر پردیش، گجرات، اتراکھنڈ اور مدھیہ پردیش میں تجاوزات یا غیر قانونی تعمیرات کے بہانے کئی مساجد، مدارس، ‘مزاروں’ اور دیگر ڈھانچے کو منہدم کیا گیا ہے۔ اتر پردیش میں یوگی آدتیہ ناتھ حکومت نے مبینہ طور پر درجنوں مساجد اور درگاہوں کے ساتھ 500 سے زیادہ مدارس کو منہدم کر دیا ہے۔ اتراکھنڈ میں وزیر اعلیٰ پشکر سنگھ دھامی کی قیادت والی حکومت مسلسل مزارات اور مدارس کو نشانہ بنا رہی ہے۔  450 سے زائد مزارات اور 50 سے زائد مدارس کو یا تو منہدم یا سیل کیا جا چکا ہے۔ بہرائچ، پیلی بھیت، مہاراج گنج اور دیگر اضلاع سے موصولہ رپورٹوں سے پتہ چلتا ہے کہ انسداد تجاوزات مہم کی آڑ میں منظم کارروائی کی جا رہی ہے۔ حال ہی میں، گجرات کے جوناگڑھ میں ایک 300 سال پرانے مزار کو میونسپل کارپوریشن نے منہدم کر دیا تھا حالانکہ مزار کے انتظامی ٹرسٹ نے اس کے حق میں قانونی ملکیت کے دستاویزات اور عدالتی حکم نامہ جمع کرایا تھا۔ گجرات ہائی کورٹ نے انہدام پر قانونی پابندی کو نظر انداز کرنے پر جوناگڑھ میونسپل کمشنر اور سینئر ٹاؤن پلانرز کو توہین کا نوٹس جاری کیا ہے۔

(بشکریہ :انڈیا ٹو مارو)