جامعہ اردو علی گڑھ  سے ادیب و کامل کے ڈگری ہولڈرس کو جھٹکا،الہ آباد ہائی کورٹ نے کالعدم قرار دیا

نئی دہلی ،29 مئی :۔

جامعہ اردو علی گڑھ  سے ڈگری حاصل کرنے والے اور سرکاری ملازمت کی راہ تلاش کرتے اور بر سر روزگار ہزاروں افراد کو الہ آباد ہائی کورٹ سے جھٹکا لگا ہے ۔ایک اہم فیصلے میں، الہ آباد ہائی کورٹ نے  جامعہ اردو علی گڑھ کی طرف سے دی گئی ڈگریوں کو غلط قرار دیا گیا ہے۔  اتر پردیش کے پرائمری اسکولوں میں اردو اسسٹنٹ ٹیچر کے طور پر تقرری کے لیے نااہل قرار دیئے گئے ہیں ۔  رپورٹ کے مطابق عدالت نے پایا کہ ادارے نے تعلیمی معیارات کی خلاف ورزی کرتے ہوئے، مناسب کلاسز کے انعقاد کے بغیر طلبا میں  ڈگریاں تقسیم کیں۔

رپورٹ کے مطابق جسٹس سوربھ شیام شمشیری نے اظہر علی اور دیگر کی طرف سے دائر درخواست کو خارج کر دیا، جنہوں نے جامعہ اردو سے ادیبِ کامل کی ڈگریاں حاصل کی تھیں اور 2013 میں اتر پردیش کے اساتذہ کی اہلیت کے امتحان (یو پی ٹی ای ٹی) میں کامیابی حاصل کی تھی۔عدالت نے اس بات پر زور دیا کہ جامعہ اردو علی گڑھ کو یونیورسٹی گرانٹس کمیشن (یو جی سی) نے تسلیم نہیں کیا ہے اور وہ باقاعدہ کلاسوں کے بغیر چلتی ہے۔ نتیجتاً اس ادارے کی ڈگریوں کو سرکاری تدریسی عہدوں کے لیے درست نہیں سمجھا جا سکتا۔

عرضی گزاروں (متعلقہ معاملات میں) نے استدلال کیا کہ انہوں نے جامعہ اردو، علی گڑھ سے ادیب کامل کی ڈگری حاصل کی ہے اور وہ یو پی کے زیر انتظام پرائمری اسکولوں میں اسسٹنٹ ٹیچرز (اردو زبان) کے طور پر تعینات ہونے کے اہل ہیں۔  انہوں نے اتر پردیش اساتذہ اہلیتی امتحان بھی کلیئر کیا ہے ۔

لائیو لا کی رپورٹ کے مطابق درخواست گزاروں نے دعویٰ کیا کہ انہیں امتحانی نتائج کے مطابق تیار کردہ میرٹ لسٹ میں شامل کیا گیا تھا جہاں کچھ کو پوسٹنگ دی گئی تھی جبکہ دیگر پوسٹنگ کے منتظر تھے۔ دریں اثنا، ادیب کامل کورس ایک سال سے بھی کم وقت میں پاس کرنے والے درخواست گزاروں کے حوالے سے انکوائری کی گئی جبکہ کورس کی مدت ایک سال تھی۔ یہ بھی پتہ چلا کہ درخواست گزاروں میں سے کچھ نے اسی سال ڈگری حاصل کی تھی جس میں انہوں نے انٹرمیڈیٹ کا امتحان دیا تھا۔

جس کے نتیجے میں ان درخواست گزاروں کی تقرریاں منسوخ کر دی گئیں جنہیں پہلے ہی پوسٹنگ دی گئی تھی۔ درخواست گزاروں نے ہائی کورٹ سے رجوع کیا اور دلیل دی کہ جامعہ اردو، علی گڑھ ایک تسلیم شدہ ادارہ ہے اور یہ قیاس آرائیاں بے بنیاد ہیں کہ وہاں اساتذہ یا کلاسز نہیں ہیں

مزید دلیل دی گئی کہ قدرتی انصاف کے اصولوں کی خلاف ورزی کی گئی ہے اور بیک وقت دو کورسز کرنے پر کوئی پابندی نہیں ہے۔ اس کے برعکس، مدعا علیہان کے وکیل نے دلیل دی کہ یہ ادارہ یونیورسٹی گرانٹس کمیشن سے تسلیم شدہ نہیں ہے۔ دلیل دی گئی کہ جامعہ اردو، علی گڑھ میں باقاعدہ کلاسز نہیں ہوتیں بلکہ ڈگریاں دی جاتی ہیں اور درخواست گزاروں نے دھوکہ دہی سے ڈگریاں حاصل کی ہیں۔

جسٹس سوربھ شیام شمشیری نے کہا، "درخواست گزار نے سال 1995 میں انٹرمیڈیٹ کا امتحان پاس کیا تھا اور اسے 26.07.1995 کو سرٹیفکیٹ جاری کیا گیا تھا۔ درخواست گزار کے معاملے کے مطابق، اس نے ادیب کامل کرنے کے لیے جولائی 1995 میں جامعہ اردو، علی گڑھ میں داخلہ لیا تھا۔ یہ امتحان   نومبر1995  منعقد ہوا تھا۔  نتیجہ جولائی، 1996 میں اعلان کیا گیا تھا۔ ریکارڈ پر پیش کیے گئے سرٹیفکیٹ سے واضح ہے کہ درخواست گزار نے فروری 1997 میں ہونے والے معلم اردو کا امتحان پاس کیا ہے۔” عدالت نے قرار دیا کہ درخواست گزار نے 5 ماہ کی قلیل مدت میں انٹرمیڈیٹ اور ادیب کامل کے دو امتحانات پاس کیے جو کہ مناسب نہیں۔ عدالت نے قرار دیا کہ جامعہ اردو غیر قانونی طور پر ڈگریاں تقسیم کر رہی ہے۔ اس لیے درخواست گزار کو اسسٹنٹ ٹیچر (اردو) کے عہدے کے لیے نااہل قرار دیا گیا۔ اس کے مطابق مرکزی رٹ پٹیشن خارج کر دی گئی۔ اسی طرح تمام متعلقہ مقدمات بھی خارج کر دیے گئے۔