اتر پردیش ،اتراکھنڈ سمیت بی جے پی کی حکمرانی والی ریاستوں میں انسداد تبدیلی مذہب قانون کی آڑ میں مسلمانوں اور عیسائیوں کے خلاف کی جا رہی زیادتیاں عام ہو گئی ہیں ۔اس قانون کا جس طرح شدت پسند ہندو تنظیموں کے ذریعہ سے غلط استعمال کیا جا رہا ہے اس پر اب عدالت نے سوال کھڑے کئے ہیں اور ریاستوں کو نوٹس جاری کر کے عدالت عظمیٰ نے جواب طلب کیا ہے ۔ رپورٹ کے مطابق عدالت عظمیٰ نے منگل کو انسداد تبدیلیٔ مذہب قوانین کو چیلنج کرنے والی عرضیوں پر سماعت کی۔ اس معاملے میں عدالت نے ریاستوں کو نوٹس دے کر جواب داخل کرنے کے لئےکہا ہے۔ یہ نوٹس اتر پردیش، اتراکھنڈ، مدھیہ پردیش، ہریانہ، گجرات اور راجستھان سمیت دس ریاستوں کو بھیجا گیا ہے۔ ان سبھی ریاستوں سےکہا گیا ہے کہ وہ چار ہفتوں میں جواب داخل کریں۔ اس معاملے میں آئندہ سماعت 6؍ ہفتہ بعد رکھی گئی ہے۔

قابل ذکر ہے کہ عرضی دہندگان نے الگ الگ ریاستوں میں بنائے گئے ان قوانین کے جواز کو چیلنج پیش کیا ہے جو مذہب تبدیل کرنے پر سزا کا التزام کرتے ہیں۔ عرضی گزاروں کا کہنا ہے کہ ان متنازع قوانین کا استعمال بین مذہبی جوڑوں کو پریشان کرنے، اورتہواروں اور مذہبی تقاریب میں رخنہ ڈالنے کے لیے کیا جا رہا ہے۔

چیف جسٹس بی آر گوَئی اور جسٹس ونود چندرن کی بنچ نے اس تعلق سے اتر پردیش، مدھیہ پردیش، ہماچل پردیش، اتراکھنڈ، چھتیس گڑھ، گجرات، ہریانہ، جھارکھنڈ، راجستھان اور کرناٹک میں تبدیلیٔ مذہب سے متعلق قوانین کے آئینی جواز کو چیلنج دینے والی ان عرضیوں پر ایک ساتھ سماعت کی۔ فی الحال عدالت عظمیٰ نے عبوری روک لگانے سے انکار کر دیا ہے لیکن ریاستوں کو نوٹس جاری کرتے ہوئے ان قوانین کی متنازع شقوں پر جواب ضرور طلب کیا ہے۔