بی جے پی کو سال 2023-24 میں سیاسی جماعتوں کی کل فنڈنگ ​​کا 74.57 فیصد عطیہ ملا

نئی دہلی،20 فروری :۔

ایسوسی ایشن فار ڈیموکریٹک ریفارمز (اے ڈی آر) کی طرف سے جاری کردہ ایک حالیہ رپورٹ کے مطابق، مرکز اور کئی ریاستوں میں برسراقتدار بی جے پی نے مالی سال 2023-24 میں 4,340.47 کروڑ روپے کی فنڈنگ ​​حاصل کی ہے، جو کہ مختلف سیاسی جماعتوں کو ملنے والی کل فنڈنگ ​​کا 74.57 فیصد ہے۔رپورٹ کے مطابق کانگریس، جو کہ فنڈنگ ​​کے معاملے میں بی جے پی سے بہت پیچھے ہے، 1,225.21 کروڑ روپے کی دوسری سب سے زیادہ آمدنی ریکارڈ کی گئی۔

اے ڈی آر کی رپورٹ کے مطابق، بی جے پی نے مالی سال 2023-24 کے دوران 4,340.47 کروڑ روپے کی کل آمدنی کا اعلان کیا، لیکن اس کا صرف 50.96 فیصد (2,211.69 کروڑ روپے) خرچ کیا ہے۔ وہیں  کانگریس کو 1,225.12 کروڑ روپے ملے اور 83.69 فیصد یعنی 1,025.25 کروڑ روپے خرچ ہوئے۔

بی جے پی اور کانگریس کی آمدنی کے بارے میں ایک قابل ذکر بات یہ ہے کہ ووٹ شیئر میں بی جے پی کانگریس سے صرف 15 فیصد آگے ہے، جب کہ آمدنی میں آر ایس ایس کی حمایت یافتہ پارٹی کانگریس سے 250 فیصد آگے ہے۔

قابل ذکر ہے کہ 2022-2023 میں بی جے پی کی آمدنی 2,360.84 کروڑ روپے تھی جو کانگریس کی آمدنی سے پانچ گنا زیادہ تھی۔ یہ مالی سال 2022-23 کے دوران چھ قومی جماعتوں کی کل آمدنی کا 76.73 فیصد ہے۔ اس طرح کل آمدنی میں بی جے پی کے حصے میں دو فیصد سے زیادہ کی معمولی کمی آئی ہے۔

اسے کانگریس کے لیے کچھ حوصلہ افزائی کے طور پر دیکھا جا سکتا ہے کہ اس نے سال 2022-23 کی آمدنی کے مقابلے میں اپنی آمدنی میں تقریباً 170 فیصد (772.744 روپے) کا کافی اضافہ کیا ہے، لیکن چونکہ اس کی بنیاد کافی کم تھی، اس لیے وہ کل آمدنی میں بی جے پی سے بہت پیچھے ہے۔

سال 2022-23 کے دوران کانگریس کی آمدنی 452.375 کروڑ روپے تھی۔ یہاں یہ بات قابل غور ہے کہ اپنی زیادہ آمدنی کے باوجود، بی جے پی نے اپنی آمدنی کا صرف 50.96 فیصد خرچ کیا، جو کہ 2,211.69 کروڑ روپے ہے۔ دوسری طرف، کانگریس نے اسی مدت کے دوران 1,025.25 کروڑ روپے خرچ کیے، جو اس کی کمائی کا 83.69 فیصد ہے۔ اس طرح بی جے پی کا خرچ کانگریس کے مقابلے دوگنا ہے۔

انڈیا ٹو مارو کی رپورٹ کے مطابق اے ڈی آر کی  رپورٹ میں صرف چھ قومی جماعتوں کی آمدنی کی معلومات شامل ہیں۔ بھارتیہ جنتا پارٹی (بی جے پی)، انڈین نیشنل کانگریس (آئی این سی)، بہوجن سماج پارٹی (بی ایس پی)، کمیونسٹ پارٹی آف انڈیا (مارکسسٹ)، سی پی آئی (ایم)، عام آدمی پارٹی (اے اے پی) اور نیشنل پیپلز پارٹی (این پی پی)۔ مجموعی طور پر، ان چھ قومی پارٹیوں نے ہندوستان بھر سے 5,820.912 کروڑ روپے کی کل آمدنی کا اعلان کیا ہے۔ممتا بنرجی کی ٹی ایم سی، چندرابابو نائیڈو کی ٹی ڈی پی، اسٹالن کی ڈی ایم کے، نتیش کمار کی جے ڈی (یو) اور لالو پرساد کی آر جے ڈی جیسی علاقائی پارٹیوں کی آمدنی اس رپورٹ میں دستیاب نہیں ہے۔

کمیونسٹ پارٹی آف انڈیا (مارکسسٹ) (سی پی آئی-ایم) نے 167.636 کروڑ روپے کی کل آمدنی کا اعلان کیا اور 127.283 کروڑ روپے خرچ کیے، جو اس کی آمدنی کا 75.93 فیصد ہے۔ بہوجن سماج پارٹی (بی ایس پی) کی کل آمدنی 64.7798 کروڑ روپے تھی، جب کہ اس سال اس کا خرچ 43.189 کروڑ روپے تھا۔

اے ڈی آر کی رپورٹ کے مطابق قومی جماعتوں کی آمدنی کا بڑا حصہ الیکٹورل بانڈز کے ذریعے ملنے والے عطیات سے آیا ہے۔ ایک بار پھر، بی جے پی کو سب سے زیادہ 1,685.63 کروڑ روپے ملے، اس کے بعد کانگریس کو 828.36 کروڑ روپے اور عام آدمی پارٹی (اے اے پی) کو 10.15 کروڑ روپے ملے۔

رپورٹ میں بتایا گیا ہے کہ کانگریس نے انتخابی اخراجات پر 619.67 کروڑ روپے خرچ کیے جو اس کا سب سے بڑا خرچ ہے۔ اس نے انتظامی اور عمومی اخراجات پر 340.70 کروڑ روپے خرچ کئے۔ دوسری طرف، بی جے پی نے انتخابی/عام مہم پر سب سے زیادہ خرچ کیا، جو کہ 1754.065 کروڑ روپے تھا، اس کے بعد انتظامی اخراجات 349.718 کروڑ روپے تھے۔ CPI-M نے انتظامی اخراجات کے لیے 56.29 کروڑ روپے اور عملے کے اخراجات کے لیے 47.57 کروڑ روپے مختص کیے ہیں۔بھارتیہ جنتا پارٹی (بی جے پی) قومی سیاسی جماعتوں میں سب سے زیادہ آمدنی حاصل کر رہی ہے اور مالی سال 2023-24 میں اس کا حصہ 74.57 فیصد ہے یعنی 4,340.47 کروڑ روپے۔