بہار ووٹر لسٹ: سپریم کورٹ کا آدھار، ووٹر آئی ڈی اور راشن کارڈ کو درست دستاویزات کے طور پر قبول کرنے کا مشورہ

نئی دہلی ،10 جولائی :۔

سپریم کورٹ نے جمعرات کو الیکشن کمیشن سے کہا کہ وہ بہار میں ووٹر لسٹ کے جاری اسپیشل انٹینسیو ریویژن (ایس آئی آر) کے دوران شناخت اور شہریت کو ثابت کرنے کے لیے آدھار کارڈ، ووٹر شناختی کارڈ اور راشن کارڈ کو درست دستاویزات کے طور پر قبول کرے۔

جسٹس سدھانشو دھولیا اور جسٹس جویمالیہ باغچی کی ڈویژن بنچ نے الیکشن کمیشن کے 24 جون کو جاری کردہ حکم نامے کو چیلنج کرنے والی درخواستوں کی سماعت کرتے ہوئے یہ تبصرہ کیا۔ مذکورہ حکم میں شہریت ثابت کرنے کے لیے 11 خصوصی دستاویزات درج ہیں، جن میں آدھار کارڈ اور ووٹر شناختی کارڈ شامل نہیں تھے۔

جسٹس سدھانشو دھولیا اور جسٹس جویمالیا باغچی کی ڈویژن بنچ نے کہا کہ ہماری ابتدائی رائے میں یہ انصاف کے مفاد میں ہوگا کہ الیکشن کمیشن ان اضافی دستاویزات کو بھی مدنظر رکھے۔ تاہم بنچ نے یہ بھی واضح کیا کہ کمیشن ان دستاویزات کی بنیاد پر کسی کا نام ووٹر لسٹ میں شامل کرنے کا پابند نہیں ہے، اور کمیشن کے پاس انہیں قبول یا مسترد کرنے کا اختیار حاصل رہے گا۔

بنچ نے ایس آئی آر کے عمل پر روک لگانے کا کوئی عبوری حکم جاری نہیں کیا، لیکن الیکشن کمیشن سے وضاحت کرنے کو کہا کہ آیا وہ آدھار، راشن کارڈ اور ای پی آئی سی کو اپنی شناخت ثابت کرنے کے لیے ووٹروں کے ذریعے جمع کرائے جانے والے دستاویزات کی فہرست میں شامل نہ کرنے کا فیصلہ کرتا ہے۔

بار اینڈ بنچ کی رپورٹ کے مطابق، عدالت نے اپنے حکم میں کہا، "دستاویزات کا مطالعہ کرنے کے بعد، الیکشن کمیشن نے نشاندہی کی ہے کہ ووٹروں کی تصدیق کے لیے دستاویزات کی فہرست 11 دستاویزات پر مشتمل ہے اور یہ مکمل نہیں ہے، اس لیے ہماری رائے میں، یہ انصاف کے مفاد میں ہوگا کہ اگر آدھار کارڈ، ای پی آئی سی کارڈ اور راشن کارڈ کو بھی الیکشن کمیشن اس دستاویز میں شامل کرنا چاہتا ہے یا نہیں۔ اگر یہ دستاویزات نہیں لیتا ہے، تو اسے اس کی وجہ بتانی ہوگی اور درخواست گزاروں کو اس سے مطمئن کرنا ہوگا، اس دوران درخواست گزار عبوری روک لگانے کے لیے دباؤ نہیں ڈال رہے ہیں۔

عدالت اپوزیشن پارٹیوں اور کچھ این جی اوز کے لیڈروں کی طرف سے دائر درخواستوں کی سماعت کر رہی تھی جس میں الیکشن کمیشن کے 24 جون کے حکم کو چیلنج کیا گیا تھا جس میں بہار میں انتخابی فہرستوں پر خصوصی نظر ثانی کا حکم دیا گیا تھا۔

درخواست گزاروں نے استدلال کیا کہ کمیشن کی طرف سے اپنایا گیا طریقہ کار عوامی نمائندگی ایکٹ کے تحت قابل عمل نہیں ہے اور اس سے شہریوں کے حق رائے دہی متاثر ہو سکتا ہے۔ انہوں نے یہ سوال بھی کیا کہ آدھار اور ووٹر آئی ڈی کو کمیشن کی طرف سے 24 جون کو جاری کردہ دستاویزات کی فہرست میں کیوں شامل نہیں کیا گیا، حالانکہ وہ عام طور پر شناخت کے لیے درست ہیں۔

سماعت میں سینئر ایڈوکیٹ گوپال شنکر نارائنن نے عرضی گزاروں کی طرف سے پیش ہوکر عرض کیا کہ یہ خصوصی   جائزہ آئین اور عوامی نمائندگی قانون کی روح کے مطابق نہیں ہے۔ انہوں نے کہا کہ یہ عمل پہلی بار اپنایا جا رہا ہے اور اس کو ایکٹ میں قانونی حیثیت حاصل نہیں ہے۔

انہوں نے دلیل دی کہ 2003 کے بعد داخلہ لینے والوں کو ہی اس عمل میں شامل کیا گیا ہے اور آدھار جیسے دستاویزات جو عام طور پر شناخت کے لیے درست ہوتے ہیں، کو فہرست سے خارج کر دیا گیا ہے۔ انہوں نے اس بات پر بھی زور دیا کہ ووٹر شناختی کارڈ، جو خود الیکشن کمیشن جاری کرتا ہے، بھی قبول نہیں کیا گیا۔

اس پر جسٹس دھولیا نے کہا کہ کمیشن آئین کے تحت دیئے گئے حقوق کے دائرہ کار میں کام کر رہا ہے اور درخواست گزار کمیشن کے اختیارات پر اعتراض نہیں کر رہے ہیں، بلکہ ان کے استعمال کے طریقے پر اعتراض کر رہے ہیں۔ شنکر نارائنن نے اس سے اتفاق کیا۔

جسٹس باغچی نے عوامی نمائندگی ایکٹ کی دفعہ 21(3) کا حوالہ دیتے ہوئے کہا کہ یہ کمیشن کو ترمیم کے طریقہ کار کو اپنانے کی صوابدید دیتا ہے اور کوئی لازمی "مقررہ طریقہ” تجویز نہیں کرتا ہے۔

شنکرارائنن نے یہ بھی الزام لگایا کہ کمیشن خصوصی زمرہ جات، جیسے عدلیہ، سرکاری خدمات اور نامور افراد کے لیے مختلف معیارات اپنا رہا ہے، جو کہ دفعہ 14 کے تحت برابری کے حق کی خلاف ورزی ہے۔ تاہم، بنچ نے عملی بنیاد پر اس دلیل کو زیادہ وزن نہیں دیا۔

جسٹس دھولیا نے وکیل سے کہا، "بائی لائن پر نہ جائیں، ہائی وے پر رہیں، بنیادی آئینی سوالات پر توجہ دیں۔”سینئر ایڈوکیٹ راکیش دویدی نے الیکشن کمیشن آف انڈیا کی طرف سے پیش ہوتے ہوئے کہا کہ کمیشن کسی بھی حقیقی ووٹر کو خارج کرنے کا ارادہ نہیں رکھتا ہے۔ لیکن بنچ نے ٹائم لائن اور طریقہ کار کی عملیتا پر کئی سوالات اٹھائے۔

جسٹس دھولیا نے ریمارکس دیے کہ اگر آپ اتنی جلدی کاغذات مانگیں گے تو عام شہری وقت پر نہیں دے پائیں گے، پریکٹیکلٹی کو بھی ذہن میں رکھنا ہوگا۔عدالت نے یہ بھی پوچھا کہ جب الیکشن کمیشن نے جن دستاویزات کا ذکر کیا ہے وہ آدھار سے منسلک ہیں تو پھر آدھار ہی کو فہرست سے کیوں باہر رکھا گیا ہے؟

بنچ نے الیکشن کمیشن سے کہا ہے کہ وہ 21 جولائی تک جوابی حلف نامہ داخل کرے اور کیس کی سماعت کی اگلی تاریخ 28 جولائی 2025 مقرر کی ہے۔

تاہم، عدالت نے کمیشن کے عمل پر فی الحال یہ کہتے ہوئے روک لگانے سے انکار کر دیا کہ یہ کسی آئینی ادارے کو کام کرنے سے نہیں روک سکتا۔ لیکن اس نے یہ بھی کہا کہ 1 اگست کو ڈرافٹ ووٹر لسٹ شائع نہ کی جائے، جب تک عدالت اس پر مزید غور نہیں کرتی۔