نئی دہلی ،29 اگست :۔
بہار میں راہل گاندھی کی ووٹر ادھیکار یاترا کے دوران اس وقت تنازعہ کھڑا ہوگیا جب اسٹیج سے ایک پروگرام کے دوران وزیر اعظم نریندر مودی کے خلاف نازیباتبصرہ کیا گیا۔اس سلسلے میں پولیس نے کاررروائی کرتے ہوئے ایک مسلم نوجوان کو گرفتار کر لیا ہے۔
بہار پولیس نے جمعہ کے روز دربھنگہ ضلع میں کانگریس لیڈر راہل گاندھی کی ‘ووٹر ادھیکار یاترا’ کے دوران وزیر اعظم نریندر مودی کے خلاف ناشائستہ زبان کا استعمال کرنے کے الزام میں ایک 20 سالہ نوجوان کو گرفتار کیا۔ملزم کی شناخت محمد رضوی عرف رضا کے طور پر ہوئی ہے، جسے دربھنگہ قصبہ کے سنگھواڑہ محلے سے حراست میں لیا گیا تھا۔ عہدیداروں نے بتایا کہ گرفتاری بی جے پی کے دربھنگہ ضلع صدر آدتیہ نارائن چودھری کی شکایت کے بعد یہ کارروائی عمل میں آئی۔
یہ مقدمہ ایک مبینہ ویڈیو منظر عام پر آنے کے بعد درج کیا گیا تھا جس میں ایک نوجوان کو وزیر اعظم کے خلاف مبینہ طور پر ہندی زبان کا استعمال کرتے ہوئے دکھایا گیا تھا۔ یہ واقعہ بدھ کو دربھنگہ قصبے میں یاترا کے دوران پیش آیا، جس کے فوراً بعد کانگریس لیڈر راہل گاندھی، ان کی بہن پرینکا گاندھی واڈرا، اور آر جے ڈی لیڈر تیجسوی یادو موٹر سائیکلوں پر مظفر پور کے لیے روانہ ہوئے۔
پولیس نے تصدیق کی کہ رضوی کے ساتھ دیگر نامعلوم افراد کے خلاف قانون کی متعلقہ دفعات کے تحت مقدمہ درج کیا گیا ہے۔ تقریب میں موجود دیگر افراد کے ملوث ہونے کا تعین کرنے کے لیے مزید تفتیش جاری ہے۔’ووٹر ادھیکار یاترا’ بہار میں راہل گاندھی کی مہم کے آؤٹ ریچ کا حصہ ہے، جس کا مقصد آئندہ انتخابات سے قبل حمایت کو متحرک کرنا ہے۔ اس واقعہ پر بی جے پی کی جانب سے شدید ردعمل سامنے آیا ہے اور اس میں ملوث افراد کے خلاف سخت کارروائی کا مطالبہ کیا گیا ہے۔