بلندشہر: سیانہ کے انسپکٹر سبودھ کمار قتل معاملہ میں قصور واروں کا سزا کا اعلان

نئی دہلی ،02 اگست :۔

بلندشہر کے سیانہ میں 2018 میں ہوئے ہجومی تشدد کے مشہور مقدمے میں 6 سال سے زیادہ عرصے بعد عدالت  نے آج قصور واروں کو سزا کا فیصلہ سنایا ،اس سے قبل اہم فیصلہ سناتے ہوئے  38 افراد کو قصور وار قرار دیا تھا۔ ایڈیشنل ڈسٹرکٹ اینڈ سیشن جج-12 گوپال جی نے جمعہ کو 38 افراد کو سزا سنائی ۔ ان میں 5 افراد کو انسپکٹر سبودھ کمار کے قتل کے جرم میں عمر قید اور 20-20 ہزار روپے کے جرمانے کی سزا دی گئی، جبکہ دیگر 33 افراد کو بلوہ، پتھراؤ اور جان لیوا حملے کے جرم میں سات سات سال قید اور سات سات ہزار روپے جرمانہ سنایا گیا ہے۔ عدالت نے واضح ہدایت دی کہ جرمانے کی رقم کا 80 فیصد حصہ مقتول انسپکٹر کی بیوی رجنی کو دیا جائے گا جبکہ باقی 20 فیصد رقم سرکاری خزانے میں جمع کرائی جائے گی۔

یہ فیصلہ 3 دسمبر 2018 کو پیش آئے اس ہولناک واقعے کے تقریباً سوا چھ سال بعد سامنے آیا ہے۔ سیانہ کے چنگراوٹھی علاقے میں گئوکشی کی افواہ پر ایک ہجومی ہنگامہ ہوا تھا جس میں کوتوال سبودھ کمار اور ایک مقامی نوجوان سُمِت کمار کی موت ہو گئی تھی۔ واقعے کے بعد حکومت نے سی او راگھویندر مشرا کی قیادت میں ایک خصوصی تحقیقاتی ٹیم (ایس آئی ٹی) تشکیل دی تھی، جس نے تقریباً 3200 صفحات پر مشتمل کیس ڈائری عدالت میں پیش کی۔

رپورٹ کے مطابق ایس آئی ٹی نے 5 مارچ اور 13 مارچ 2019 کو دو چارج شیٹ داخل کیں، جن میں 44 افراد کو ملزم بنایا گیا۔ ان میں پانچ کی دوران سماعت موت ہو گئی جبکہ ایک نابالغ ملزم کا مقدمہ الگ سے بچوں کی عدالت میں زیرِ سماعت ہے۔ جن 33 افراد کو سات سال کی سزا ملی ہے، ان میں بی جے پی لیڈر سچن اہلاوت اور ضلع پنچایت ممبر یوگیش راج کے نام شامل ہیں۔ عدالت نے سماعت کے دوران تفصیلی شواہد کی بنیاد پر فیصلہ سنایا اور قرار دیا کہ پانچ مجرموں نے نہ صرف فساد میں حصہ لیا بلکہ کوتوال سبودھ کمار کو جان بوجھ کر نشانہ بنایا۔