برطانیہ ،کناڈا اور اسٹریلیا کے بعد اب فرانس نے بھی فلسطین کو الگ ریاست کے طور پر تسلیم کر لیا ہے ۔غزہ میں جاری جارحیت کے خلاف دنیا بھر میں اٹھنے والی آواز نے اپنا اثر دکھایا ہے ۔ انصاف پسند طبقات کے دباؤ میں ممالک فلسطین کے تئیں اپنا رخ اور اسرائیلی سفاکیت کے تئیں اپنا رویہ تبدیل کرتے نظر آ رہے ہیں ۔حالیہ دنوں میں دنیا بھر میں فلسطین کو لے کر الگ نظریہ دیکھنے کو مل رہا ہے۔کناڈا ،آسٹریلیا اور برطانیہ کے بعد اب فرانس نے بھی فلسطین کو ایک الگ اور آزاد ریاست کے طور پر تسلیم کرنے کا اعلان کر دیا ہے۔فرانس کے صدر ایمانوئل میکرون نے تصدیق کی ہے کہ ان کی حکومت نے فلسطینی ریاست کو باضابطہ طور پر تسلیم کرلیا۔انھوں نے نیویارک میں اقوام متحدہ سے خطاب میں فرانس کی جانب سے فلسطینی ریاست کو تسلیم کرنے کا اعلان کرنے سے قبل کہا کہ ’غزہ میں جنگ بند کرنے اور حماس کی جانب سے حراست میں لیے گئے باقی 48 یرغمالیوں کو رہا کرنے کا وقت آگیا ہے۔

ان کا کہنا تھا کہ ’چند لمحوں کی دوری ہے اور پھر دنیا امن کو روک نہیں پائے گی ۔انھوں نے مزید کہا ’ہم مزید انتظار نہیں کر سکتے۔‘صدر میکرون نے سات اکتوبر کے حملوں کی مذمت کی اور کہا ہے کہ وہ خطے میں امن دیکھنا چاہتے ہیں جو دو ریاستوں کو ساتھ ساتھ رہنے سے پیدا کیا جائے۔فرانس کے صدر کا کہنا تھا کہ ’جاری جنگ کا کوئی جواز نہیں ہے‘۔ ’انھوں نے مزید کہا کہ ’ہر چیز ہمیں مجبور کرتی ہے‘ کہ اسے حتمی انجام تک پہنچائیں ۔واضح رہے کہ اقوامِ متحدہ کے 193 رُکن ممالک میں سے 75 فیصد فلسطین کو پہلے ہی بطور ایک ریاست تسلیم کر چکے ہیں۔ جن ممالک نے یہ قدم اب تک نہیں اُٹھایا ہے ان میں امریکہ، اسرائیل، اٹلی اور جرمنی بھی شامل ہیں۔