بارڈر سیکورٹی فورس کے شہید سب انسپکٹر محمد امتیاز کی تجہیز و تکفین،ہندوستان زندہ باد کے نعرے لگے

نئی دہلی ،پٹنہ، 12 مئی :۔

بارڈر سیکورٹی فورس (بی ایس ایف) کے سب انسپکٹر محمد امتیاز گزشتہ 10 مئی کو جموں و کشمیر کے آر ایس پورہ سیکٹر میں پاکستانی فائرنگ میں شہید ہوگئے تھے۔ پیر کے روز ا انہیں آخری الوداعی دی گئی۔ تمام سرکاری رسومات اور گارڈ آف آنر کی تکمیل کے بعد شہید  امتیاز کو نم آنکھوں کے ساتھ الوداع کیا گیا۔ اس سے قبل نماز جنازہ ادا کی گئی۔ اس موقع پر گاؤں والوں نےویر شہید محمد امتیاز امر رہے، ہندوستان زندہ باد اوربھارت ماتا کی جئے کے نعرے لگائے۔

اس سے قبل جیسے ہی شہید کی لاش سارن ضلع کے گڑکھا تھانہ علاقے کے جلال بسنت پنچایت کے گاؤں نارائن پور پہنچی تو وہاں گاؤں والوں کی بڑی بھیڑ جمع ہوگئی۔ جس وقت جسد خاکی پٹنہ سے گڑکھا آرہی تھی، سینکڑوں مقامات پر لوگوں نے خراج عقیدت پیش کیا۔ جس وقت شہید کے جسد خاکی کو نارائن پور گاؤں لے جایا جا رہا تھا، ہزاروں کا ہجوم شہید کے آخری دیدار کے لیے تقریباً دو کلومیٹر تک سڑک کے دونوں طرف جمع ہو گئے۔ لوگوں نے ترنگا لہرایا    ۔ لوگ مسلسل ’ہندوستان زندہ باد، بھارت ماتا کی جئے‘ کے نعرے بھی لگا رہے تھے۔

پٹنہ ایئرپورٹ پر شہید کو شاندار خراج عقیدت پیش کیا گیا۔ خراج عقیدت پیش کرنے والوں میں ریاست کے دیہی ترقیات کے وزیر شرون کمار، وزیر نتن نوین، بی جے پی کے ریاستی صدر دلیپ جیسوال، قائد حزب اختلاف تیجسوی یادو اور دیگر کئی رہنما شامل تھے۔ سب نے شہید کوگلپوشی کر خراج عقیدت پیش کیا اور شہید کے اہل خانہ سے اظہار تعزیت کیا۔

شہید کے بیٹے عمران رضا نے کہا کہ "میرے والد بہت مضبوط آدمی تھے اور مجھے ان پر بہت فخر ہے، میں نے ان سے 10 مئی کو صبح 5:30 بجے بات کی، ڈرون حملے میں ان کی دائیں پیر زخمی ہوئی، یہ میری ان سے آخری بات تھی، حکومت پاکستان کو ایسا سبق سکھائے اور ایسا منہ توڑ جواب دے کہ کوئی بیٹا اپنے باپ سے دور نہ رہ سکے ۔

دریں اثنا نماز جنازہ کے دوران کی ایک ویڈیو وائرل ہورہی ہے جس میں ایک عالم ہیں جو شہید امتیاز کی خصوصیت اورملک کے لئے ان کی شہادت کو یاد کر رہے ہیں ۔ اس دوران انہوں نے مسلمانوں کو حب الوطنی کا طعنہ دینے والوں کو بھی اشاروں اشاروں میں للکارا اور انہوں نے کہا کہ آج محمد امتیاز کی شہادت یہ گواہی دے رہی ہے کہ مسلمان اپنے ملک سے اپنی جان سے بھی زیادہ پیار کرتا ہے ۔ اپنے وطن کو اپنے سینے اور آنکھوں میں بساتا ہے ۔

اس دوران شہید محمد امتیاز کے جنازے میں بڑی تعدا د میں لوگ شریک ہوئے۔