نئی دہلی ،جے پور،07 مارچ :۔
سوشل ڈیمو کریٹک پارٹی آف انڈیا کے قومی صدر ایم کے فیضی کی گرفتاری کے بعد ای ڈی ملک بھر میں ایس ڈی پی آئی کے دفاتر پر چھاپے مار رہی ہے۔ اس دوران مختلف مقامات پر ای ڈی کو مقامی مسلمانوں کے احتجاج کا بھی سامنا کرنا پڑا ۔ رپورٹ کے مطابق انفورسمنٹ ڈائریکٹوریٹ (ای ڈی) نے جمعرات کی رات جے پور کے آدرش نگر میں سوشل ڈیموکریٹک پارٹی آف انڈیا (SDPI) کے ریاستی دفتر پر چھاپہ مارا۔ ایس ڈی پی آئی کارکنوں نے احتجاج کرتے ہوئے حکومت کے خلاف نعرے لگائے۔ پولیس کی بھاری نفری تعینات تھی۔
یہ چھاپہ ایس ڈی پی آئی کے قومی صدر ایم کے فیضی کی دو دن قبل پریونشن آف منی لانڈرنگ ایکٹ (پی ایم ایل اے) کے تحت گرفتاری کے بعد کیا گیا ہے۔ دھنا داس کی باغیچی میں واقع مرکزی دفتر میں ایس ڈی پی آئی عہدیداروں سے پوچھ گچھ کی گئی، لیکن کوئی گرفتاری عمل میں نہیں آئی۔
رپورٹ کے مطابق ای ڈی نے ملک بھر میں 12 مقامات پر ایس ڈی پی آئی کے دفاتر پر بھی چھاپے مارے جن میں دہلی، ترواننت پورم، ملاپورم، بنگلورو، نندیال، تھانے، چنئی، پاکور، کولکتہ اور لکھنؤ شامل ہیں۔ یہ کارروائیاں جاری تحقیقات کا حصہ ہیں۔
واضح رہے کہ ایس ڈی پی آئی، ممنوعہ پاپولر فرنٹ آف انڈیا (پی ایف آئی) کا ایک سیاسی محاذ، 2018 سے فیضی کی قیادت میں ہے۔ انہیں 3 مارچ کو گرفتار کیا گیا تھا اور دہلی کی ایک خصوصی عدالت نے اسے چھ دن کی ای ڈی حراست میں بھیج دیا۔