تہران ،14 جون :۔
اسرائیل کی جانب سے براہ راست ایران پر حملے کے بعد مشرق وسطیٰ کے حالات کشیدہ ہیں ۔دونوں ممالک کی جانب سے حملوں کی دھمکیوں اور دھماکوں کو سلسلہ جاری ہے ۔ جمعہ کی رات کو ایران نے اسرائیل پر جوابی حملہ کیا اور میزائلوں کی ایک بوچھار تل ابیب پر کر دی جس سے اسرائیل کی راجدھانی میں ہر طرف دھواں دھواں بکھر گیا اور آسمان دھوئیں کے غبار سے اٹ گیا ۔
العربیہ کی رپورٹ میں بتایا گیا ہے کہ ایران کے سرکاری ٹیلی ویژن نے اطلاع دی ہے کہ ایرانی میزائل حملوں کی ایک نئی بوچھاڑ تہران اور کرمنشاہ سے شروع کی گئی۔ کرمنشاہ مغربی ایران کا ایک شہر ہے۔اسرائیلی فوج نے جمعہ کی شام اعلان کیا تھا کہ اس نے ایران سے اسرائیل کی طرف دو لہروں میں داغے گئے 100 سے کم راکٹوں کا پتہ لگایا ہے اور ان میں سے زیادہ تر کو روک لیا گیا ہے۔
ایرانی حملوں کے بعد اسرائیل بھر میں فضائی حملے کے سائرن بج رہے تھے۔ تل ابیب میں دھماکوں کی آوازیں سنی گئیں۔ اسرائیلی فوج نے وضاحت کی ہے کہ اسرائیل میں سنی جانے والے دھماکے یا تو مداخلت یا میزائل کے اثرات کا نتیجہ تھے۔
میزائل حملوں کے عروج پر اسرائیلی فوج نے رہائشیوں سے بم پروف بنکروں اور پناہ گاہوں میں رہنے کی اپیل کی۔ بعد میں یہ انتباہ اٹھا لیا گیا اور شہریوں کو بم پروف پناہ گاہوں سے نکلنے کی اجازت دے دی گئی تاہم کہا گیا کہ وہ ان پناہ گاہوں کے قریب ہی رہے۔
ایرانی میڈیا کے مطابق ایران نے اسرائیل کی طرف سینکڑوں بیلسٹک میزائل داغے ہیں۔ یہ شدید اسرائیلی حملوں پر تہران کے ردعمل کا آغاز ہے۔ ایرانی پاسداران انقلاب نے اپنی طرف سے کہا کہ اس نے ایران پر حملوں کے جواب میں اسرائیل میں درجنوں اہداف پر حملے کیے ہیں۔
ایران کی جانب سے بیلسٹک میزائلوں کے حملے کے بعد تل ابیب پر گہرا دھواں اٹھ گیا۔ دھماکوں کی آوازیں سنائی دیتی رہیں ۔ ساحلی شہر میں کئی فلک بوس عمارتوں پر دھوئیں کے بادل چھا گئے۔ اسرائیل نے اطلاع دی ہے کہ ایرانی میزائل حملوں کے نتیجے میں وسطی اسرائیل میں 34 افراد زخمی ہوئے ہیں۔ اسرائیلی فائر سروس نے یہ بھی اعلان کیا کہ اس کی ٹیموں نے ایرانی میزائل حملے کے نتیجے میں ہونے والے کئی بڑے واقعات پر رد عمل دیا ہے۔
اسرائیلی فوج نے اس بات کی تصدیق کی ہے کہ ایرانی میزائل کی مداخلت سے عمارتوں کی ایک محدود تعداد کو نقصان پہنچا ہے۔ اسرائیلی فوج کے ترجمان نے جمعے کے روز قبل ازیں خبردار کیا تھا کہ ایران اسرائیل کے ہوم فرنٹ کو "اہم” نقصان پہنچانے کی صلاحیت رکھتا ہے۔ انہوں نے کہا اسرائیل کے پاس ایران میں گھریلو محاذ کو اہم نقصان پہنچانے کی صلاحیت ہے۔