انڈیا اسلامک کلچرل سینٹر میں گروتیغ بہادر کی یاد میں سمینار،سکھ مسلم دانشوروں کا خطاب

دعوت ویب ڈیسک

نئی دہلی،25 اگست :۔

انڈیا اسلامک کلچرل سنٹر، انڈین مسلمز فار سول رائٹس، اے آئی پی ایم، اور کیندریہ سنگھ سبھا کے  زیر اہتمام مشترکہ طور پر اتوار کو منعقدہ "حق امن” کے عنوان سے ایک سیمینار  کا انعقاد عمل میں آیا جس میں  مختلف تنظیموں اور اداروں سے وابستہ شخصیات نے خطاب کیا۔ مقررین نے ہندوستان کے کثیر معاشرے میں مذہبی آزادی کے تحفظ، بھائی چارے کے فروغ، اور انصاف کو برقرار رکھنے کی فوری ضرورت پر زور دیا۔

سکھوں کے نویں گرو، گرو تیغ بہادر جی کی 350ویں یومِ شہادت کی یاد میں منعقد ہونے والا سیمینار ایک تاریخی یادگار  سے بڑھ کر تھا۔ یہ ہمدردی، اتحاد اور انصاف کو عصری ہندوستان کے رہنما اصولوں کے طور پر زندہ کرنے کی دلی اپیل بن گئی۔

جموں و کشمیر کے سابق وزیر اعلیٰ فاروق عبداللہ نے جذباتی خطاب کے کیا۔  انہوں نے انسانیت کے زوال اور موجودہ ہندوستان میں خوف کے عروج پر افسوس کا اظہار کیا۔ انہوں نے موجودہ سیاسی قوتوں پر مذہب کا غلط استعمال کرنے کا الزام لگاتے ہوئے کہا کہ "وہ طاقت جس نے ہمیں کبھی برطانوی استعمار کے خلاف متحد کیا تھا، آج غائب ہے۔  عبداللہ نے سکھ برادری کی لچک اور نظم و ضبط کی تعریف کی، جبکہ ہندوستانیوں سے کہا کہ وہ اپنے اندر خدا کو پہچانیں اور وقار اور باہمی احترام کے ساتھ زندگی گزاریں۔

اس موقع پر جماعت اسلامی ہند کے امیر سیدسعادت اللہ حسینی نے اس بات پر زور دیا کہ گرو تیغ بہادر کی شہادت سے انصاف اور مذہبی آزادی کے لیے ایک نئی جدو جہد کو تحریک دینی چاہیے۔ انہوں نے اس بات پر زور دیا کہ کسی بھی حکمراں کو خواہ کوئی بادشاہ ہو یا منتخب حکومت کو ضمیر کی آزادی کو کم کرنے کا حق نہیں ہے، اسے گرو کی قربانی کا سب سے بڑا سبق قرار دیا ہے۔ حسینی نے حاضرین کو یاد دلایا کہ اسلام اور سکھ مت انصاف، مساوات اور ظلم کے خلاف مزاحمت کرنے میں مشترکہ بنیاد رکھتے ہیں۔ انہوں نے کہا کہ تاریخ ایک مشعل راہ ہونی چاہیے جو ہماری رہنمائی کرے، ایسا ہتھیار نہیں جو ہمیں تقسیم کرے۔

کانگریس کے ترجمان اور سی ڈبلیو سی کے رکن، گرودیپ سپل نے گرو تیغ بہادر کی شہادت کو ہندوستان کی تکثیری شناخت کا سنگ بنیاد قرار دیا۔

سابق مرکزی وزیر سلمان خورشید نے بین المذاہب مکالمے کی طاقت پر روشنی ڈالتے ہوئے زور دیا کہ اس طرح کی کوششوں کو نوجوان نسلوں تک پہنچنا چاہیے۔ انہوں نے افہام و تفہیم کو فروغ دینے میں دیا سنگھ اور محمد ادیب جیسے کمیونٹی لیڈروں کے کردار کی تعریف کی۔

جماعت اسلامی ہند کے نائب صدر پروفیسر سلیم انجینئر نے سیاست اور میڈیا کی معاونت کے بغیر براہ راست بات چیت کی دعوت دی۔  انہوں نے کہا کہ یہ ادارے   بداعتمادی پیدا کرتے ہیں۔ انہوں نے زور دیا کہ حقیقی عقائد لوگوں کو کبھی تقسیم نہیں کرتے۔ تقسیم کے سانحات پر غور کرتے ہوئے، انہوں نے ان قوتوں کے خلاف خبردار کیا جو سیاسی فائدے کے لیے پرانے زخموں کوکریدتی ہیں۔ انہوں نے برادریوں کو اکٹھا کرنے کے لیے سیمینار کی تعریف کی، اس بات پر زور دیا کہ بھائی چارہ اور محبت آج ہندوستان کی سب سے بڑی ضرورت ہے۔

قبل ازیں، یادگاری کمیٹی کے کنوینر دیا سنگھ نے حق امن یاترا کی تجویز پیش کی جو سیاسی یاترا کے بجائے امن کا کارواں ہے۔ انہوں نے یاد دلایا کہ دہشت گردی تشدد سے پروان چڑھتی ہے، اور یہ کہ ہندوستان کا حقیقی ورثہ برابری اور امن میں ہے۔ گرو نانک کی تعلیمات سے لے کر گرو تیغ بہادر کی شہادت تک سکھ تاریخ کا بیان کرتے  ہوئے سنگھ نے اس بات پر زور دیا کہ سکھوں کی قربانیاں ہمیشہ تمام برادریوں کے لیے وقار، انصاف اور اتحاد کے لیے رہی ہیں۔

اس موقع پر، دیا سنگھ کی لکھی ہوئی ہندی میں ایک کتاب ’’آئینہ: سکھ ایک قوم، تاریخ کے جھروکھے سے‘‘  کا بھی اجرا کیا گیا۔ کتاب میں دیا سنگھ کا کہنا ہے کہ ’’بنیاد پرست اقدار پر مبنی کوئی بھی معاشرہ زیادہ دیر تک زندہ نہیں رہ سکتا۔ ایسے معاشرے بکھر جاتے ہیں اور قوم کی بنیادیں ہل جاتی ہیں‘‘۔

سیمینار سے خطاب کرنے والے دیگر ممتاز مقررین میں اے آئی پی ایم کے قومی صدر دیا سنگھ، ڈاکٹر فاروق عبداللہ (سابق وزیراعلیٰ)، ڈاکٹر گرمیت سنگھ (پنجابی یونیورسٹی)، ایس ہردیپ سنگھ (راجستھان سنگھ سبھا)، سلمان خورشید (سابق مرکزی وزیر)،   محسن تقوی (اسلامک اسکالر)، جسٹس (ر)  اقبال انصاری،  انجینئر محمد سلیم (صدر، دھارمک جن مورچہ)، محمد ادیب (سابق ایم پی، راجیہ سبھا)، جتیھدار کرنیل سنگھ (سابق جی ایس، ایس جی پی سی)،   محب اللہ قاسمی (ایم پی لوک سبھا)، بی بی شکنتلا راوت (سابق وزیر، راجستھان)، پروفیسر شام سنگھ (صدر، کیندری سنگھ سبھا) اور پنجاب خواتین کمیشن، بی بی پرمجیت کور۔