اسرائیل کا حماس کے عسکری ونگ کے ترجمان ابو عبیدہ کی ہلاکت  کا دعویٰ

تل ابیب ،31 اگست :۔

غزہ میں جاری اسرائیلی جارحیت کے تیز ہونے کے درمیان اسرائیل نے ایک بڑا دعویٰ کرتے ہوئے کہا ہے کہ حماس کے عسکری ونگ کے ترجمان ابو عبیدہ کو ہلاک کر دیا گیا ہے ۔اسرائیلی وزیر دفاع اسرائیل کاٹز نے اتوار کو دعویٰ کیا کہ حماس کے عسکری ونگ کے ترجمان ابو عبیدہ غزہ شہر کے علاقے رمل میں ایک فضائی حملے میں مارے گئے ہیں۔

میڈیا رپورٹوں کے مطابق اسرائیلی وزیر دفاع اسرائیل کاٹز نے اتوار کو  سوشل میڈیا پلیٹ فارم ایکس پر اس امر کی تصدیق کی کہ حماس کے عسکری ونگ کے ترجمان ابو عبیدہ غزہ شہر کے علاقے رمل میں ایک فضائی حملے میں مارے گئے ہیں۔اسرائیلی فوج کے مطابق یہ حملہ اسرائیلی دفاعی افواج (IDF) اور داخلی انٹیلیجنس ایجنسی شین بیت کی مشترکہ کارروائی تھی، جس میں جدید انٹیلیجنس اور درست نشانہ بنانے والے ہتھیار استعمال کیے گئے۔

 دعویٰ کیا جا رہا ہے کہ حملہ 30 اگست 2025 کو مقامی وقت کے مطابق شام 5:30 کے قریب ہوا۔نشانہ ایک رہائشی عمارت تھی جہاں ابو عبیدہ موجود تھے۔حملے میں کم از کم 19 افراد ہلاک ہوئے، جن میں عام شہری بھی شامل تھے۔رمل میں مذکورہ عمارت مکمل طور پر تباہ ہو گئی، اور زخمیوں کی تعداد درجنوں میں ہے۔

 دوسری جانب وزیرِ اعظم نیتن یاہو  کے دفتر کی جانب سے جاری بیان میں کہا گیا، ”ہم نے حماس کے ترجمان، ایک دہشت گرد تنظیم کے ترجمان اور برائی کے نمائندے، ابو عبیدہ کو نشانہ بنایا۔‘‘ایک حکومتی اجلاس سے قبل نیتن یاہو  نے مزید کہا، ”ابھی تک ہمارے پاس کوئی حتمی نتیجہ نہیں ہے۔ اگرچہ مجھے امید ہے کہ وہ اب ہمارے درمیان نہیں ہے، میں یہ بھی واضح کرنا چاہتا ہوں کہ حماس کی جانب سے اس حوالے سے  کسی قسم کی رپورٹننگ کے لیے حماس کا کوئی ترجمان موجود  نہیں ہے۔‘‘

 دریں اثنا اسرائیلی حکام کے دعوے  کے مطابق حماس نے ابھی تک ابو عبیدہ کی موت کی باضابطہ تصدیق نہیں کی ہے۔کچھ فلسطینی ذرائع، اس حملے کو ”نفسیاتی جنگ‘‘ قرار دے رہے ہیں اور دعویٰ کرتے ہیں کہ ابو عبیدہ زندہ ہیں، کیونکہ ان کا آخری بیان 29 اگست کو جاری ہوا تھا۔ حماس کے ذرائع نے فلسطینیوں سے اپیل کی ہے کہ وہ ابو عبیدہ کی موت کی افواہیں نہ پھیلائیں۔