نئی دہلی ،16 اکتوبر :۔
ملک میں بھلے ہی مسلم دشمنی میں اندھے شدت پسند افراد ظالم اسرائیل کی حمایت کر رہے ہوں لیکن اب بھی متعدد انصاف پسند رہنمامظلوم فلسطین کے لئے اپنی آواز بلند کر رہے ہیں ۔معروف سیاسی رہنما اور این سی پی کے صدر شرد پوار نے اسرائیل اور فلسطین کے درمیان جاری جنگ پر اپنا ردعمل دیا۔ علاقائی دفتر میں منعقدہ میٹنگ میں انہوں نے فلسطین کی حمایت کا اظہار کیا۔ انہوں نے کہا کہ اسرائیل فلسطین جنگ عالمی امن کے لیے خطرہ ہے۔ وہاں کی زمینیں اور مکانات فلسطین کے تھے، اسرائیل نے ان پر قبضہ کر لیا۔
این سی پی صدر نے مزید کہا، "ملک کے سابق وزرائے اعظم جواہر لال نہرو، اندرا گاندھی، راجیو گاندھی اور اٹل بہاری واجپئی کا کردار فلسطین کی مدد کرنا تھا۔‘‘ انہوں نے کہا کہ موجودہ وزیراعظم نے بدقسمتی سے اسرائیل کا ساتھ دے کر اصل مالکان کی مخالفت کی ہے۔ این سی پی کا کردار واضح ہے کہ وہ اصل مالکان اور محنت کش لوگوں کے حق میں ہے۔
اسرائیل حماس جنگ کے حوالے سے ملک میں کافی سیاست چل رہی ہے۔ اس کو لے کر کانگریس نے فلسطین کی حمایت میں قرارداد پاس کی تھی جس کے بعد بی جے پی لیڈروں نے کانگریس پر حملہ کیا۔ آسام کے وزیر اعلیٰ اور بی جے پی لیڈر ہمانتا بسوا سرما نے تو کانگریس پارٹی کا موازنہ پاکستان سے کیا تھا۔ آسام کے وزیر اعلیٰ نے حماس کے حامیوں کے ساتھ سختی سے نمٹنے کی بات بھی کی تھی۔
حماس کے حملے کے بعد اسرائیل غزہ میں فضائی حملے کر رہا ہے۔ دریں اثناء اسرائیل نے شمالی غزہ کے شہریوں کو جنوب کی طرف جانے کی وارننگ جاری کی تاکہ وہ زمینی حملہ کر سکے۔