’ادے پور فائلز‘کے خلاف جمعیۃ علمائے ہند نے ہائی کورٹ میں عرضی دائر کی 

نئی دہلی ،07 جولائی :۔

ادے پور واقعے پر مبنی فلم ’ادے پور فائلز‘ کا ٹریلر جیسے ہی ریلیز ہوا، اس پر پابندی لگانے کا مطالبہ زور پکڑنے لگا۔ اس فلم کے ٹریلر میں نپور شرما کا متنازعہ بیان بھی شامل ہے، جس کی وجہ سے نہ صرف ملک میں فرقہ وارانہ کشیدگی پیدا ہوئی بلکہ بین الاقوامی سطح پر بھی ہندوستان کی شبیہ کو نقصان پہنچا اور دیگر ممالک کے ساتھ ہمارے تعلقات بھی منفی طور پر متاثر ہوئے۔جس کی وجہ سے بھارتیہ جنتا پارٹی نے نپور شرما کو پارٹی سے نکال دیا۔

فلم کے ٹریلر میں نبی کریم صلی اللہ علیہ وسلم اور ان کی پاکیزہ ازواج مطہرات کے بارے میں قابل اعتراض  تبصرے   کیے گئے ہیں جو ملک کا امن خراب کر سکتے ہیں۔ فلم میں دیوبند کو بنیاد پرستی کا گڑھ بتایا گیا ہے اور وہاں کے علمائے کرام کے خلاف زہر اگل دیا گیا ہے۔

یہ فلم ایک مخصوص مذہبی طبقے کو بدنام کرتی ہے، جس سے معاشرے میں نفرت پھیل سکتی ہے اور شہریوں کے درمیان احترام اور سماجی ہم آہنگی کو گہرا نقصان پہنچ سکتا ہے۔

فلم میں ‘گیانواپی مسجد’ جیسے مقدمات کا بھی ذکر کیا گیا ہے، جو اس وقت وارانسی کی ضلعی عدالت اور سپریم کورٹ میں زیر التوا ہیں۔ یہ چیزیں ہندوستانی آئین کے آرٹیکل 14، 15 اور 21 میں دیے گئے شہری حقوق کی خلاف ورزی ہیں۔

سنسر بورڈ کی جانب سے سرٹیفکیٹ جاری ہونے کے بعد یہ فلم جمعہ 11 جولائی کو ریلیز کی جانی ہے۔ اس کو روکنے کے لیے جمعیۃ علماء ہند کے صدر مولانا ارشد مدنی نے دہلی کے ساتھ ساتھ مہاراشٹرا اور گجرات ہائی کورٹس میں عرضی داخل کی ہے۔ اس عرضی میں مرکزی حکومت، سنسر بورڈ، Johnny Fire Fox Media Pvt. لمیٹڈ اور ایکس کور، جو فلم کی تیاری اور تقسیم میں شامل ہیں، کو فریق بنایا گیا ہے۔آئین کے سیکشن 226 کے تحت دائر کی گئی یہ پٹیشن سپریم کورٹ کے وکیل فضیل ایوبی نے تیار کی ہے جس کا ڈائری نمبر ہے:ڈائری نمبر E-4365978/2025

درخواست میں کہا گیا ہے کہ آزادی اظہار رائے کے حق کا غلط استعمال کرتے ہوئے فلم میں ایسے مناظر دکھائے گئے ہیں جن کا اسلام، مسلمانوں اور دیوبند سے کوئی تعلق نہیں ہے۔ ٹریلر سے واضح ہے کہ یہ فلم مسلم مخالف جذبات سے متاثر ہے۔

مولانا ارشد مدنی نے نفرت پھیلانے والی اس فلم پر شدید ردعمل کا اظہار کرتے ہوئے کہا کہ یہ فلم ملک میں امن اور فرقہ وارانہ ہم آہنگی کو بھڑکانے کے لیے بنائی گئی ہے۔ اس کے ذریعے ایک مخصوص طبقے، اس کے علمائے کرام اور دینی تعلیمی اداروں کی شبیہ کو نقصان پہنچانے کی سازش رچی گئی ہے۔ انہوں نے حیرت کا اظہار کیا کہ سنسر بورڈ نے اپنے تمام اصول و ضوابط کو نظرانداز کرتے ہوئے اس فلم کی منظوری کیسے دی؟

مولانا نےمیڈیا کو جاری ایک ریلیز میں  کہا کہ اس سے صاف ظاہر ہوتا ہے کہ اس فلم کے پیچھے کچھ طاقتیں اور لوگ ہیں جو ایک خاص کمیونٹی کی شبیہ کو خراب کرنا چاہتے ہیں اور ملک کی اکثریتی آبادی میں ان کے خلاف زہر پھیلانا چاہتے ہیں۔ انہوں نے کہا کہ فلم کو پاس کروا کر سنسر بورڈ نے مجرمانہ سازش میں حصہ لیا ہے۔ ایسا لگتا ہے کہ یہ بورڈ بھی فرقہ پرست طاقتوں کے ہاتھ کی کٹھ پتلی بن گیا ہے۔ان کا مزید کہنا تھا کہ یہ پہلی بار نہیں ہے، اس سے قبل بھی سنسر بورڈ کئی متنازع فلموں کی منظوری دے چکا ہے، جس سے واضح ہوتا ہے کہ ایسی فلمیں کسی بڑی سازش کے تحت بنائی جارہی ہیں۔

واضح رہے کہ یہ فلم 2022 میں ادے پور میں پیش آنے والے ایک واقعے پر مبنی ہے، لیکن ٹریلر سے ہی یہ بات واضح ہے کہ فلم کا مقصد ایک خاص مذہبی برادری کو منفی اور جانبدارانہ انداز میں پیش کرنا ہے، جو کہ اس کمیونٹی کے لوگوں کے عزت کے ساتھ زندگی گزارنے کے بنیادی حقوق کی سیدھی خلاف ورزی ہے۔

فلم میں نہ صرف گیانواپی مسجد جیسے حساس معاملے کا ذکر ہے بلکہ ٹریلر میں بھی وہی قابل اعتراض مواد ہے جو نوپور شرما کے متنازعہ بیان میں تھا، جس کی وجہ سے ملک بھر میں فرقہ وارانہ کشیدگی پھیل گئی اور بین الاقوامی سطح پر ہندوستان کی شبیہ کو بھی نقصان پہنچا۔

مولانا مدنی نے آخر میں کہا کہ ہندوستان ایک جمہوری اور سیکولر ملک ہے، جس کا آئین تمام شہریوں کو بولنے، کھانے پینے، پہننے اور اپنے مذہب پر عمل کرنے کی مکمل آزادی دیتا ہے۔ لیکن آزادی اظہار کے نام پر کسی بھی کمیونٹی کے مذہبی جذبات کو مجروح کرنے کی اجازت نہیں ہے۔اسی لیے ہم نے اس فلم کی نمائش روکنے کے لیے قانونی جنگ کا راستہ چنا ہے اور سنسر بورڈ کو بھی اس میں فریق بنایا ہے، کیونکہ اس کا جرم بھی ان لوگوں سے کم نہیں جنہوں نے یہ مکروہ فلم بنائی ہے۔