اتراکھنڈ حکومت نے اسکولوں میں گیتا، رامائن کو لازمی قرار دیا, ٹیچر ایسوسی ایشن کا اعتراض
ٹیچر ایسوسی ایشن کے صدر سنجے کمار ٹمٹا کا کہنا ہے کہ یہ مذہبی کتابیں ہیں، اور سرکاری اسکولوں میں مذہب کی تعلیم ہندوستانی آئین کے خلاف ہے
دعوت ویب ڈیسک
نئی دہلی ،17 جولائی :۔
اترا کھنڈ کی دھامی حکومت مسلسل ہندوتو کی راہ پر گامزن ہے۔کامن سول کوڈ کے نفاذ کے اعلان کے بعد حالانکہ ابھی تک حکومت خود یکساں سول کوڈ کے مکمل نفاذ پر تذبذب کا شکار ہے ۔دریں اثنا اتراکھنڈ حکومت نے ہندوتو کی جانب ایک اور قدم اٹھاتے ہوئے اسکولوں میں گیتا رامائن کو لازمی قرار دیا ہے ۔رپورٹ کے مطابق وزیر اعلیٰ پشکر سنگھ دھامی کی ہدایات پر عمل کرتے ہوئے بدھ سے شروع ہوئے ریاست کے اسکولی نصاب میں سریمد بھگو د گیتا اور رامائن کو شامل کیا ہے۔ یہ فیصلہ سناتن دھرم کے اس آستھا پر مبنی ہے کہ گیتا زندگی کے رموز کو سکھاتی ہے۔زندگی کیسے گزارنی ہے اس بارے میں قیمتی رہنمائی پیش کرتی ہے۔
تاہم حکومت کے اس اقدارم کے خلاف آواز اٹھنے لگی ہے ۔ریاست بھر میں اساتذہ کی انجمنوں کی جانب سے فوری اور سخت مخالفت کا سامنا کرنا پڑا ہے۔ ان کا کہنا ہے کہ یہ مذہبی کتابیں ہیں، اور سرکاری اسکولوں میں مذہب کی تعلیم ہندوستانی آئین کے خلاف ہے۔
ٹیچر ایسوسی ایشن کے صدر سنجے کمار ٹمٹا کا کہنا ہے کہ”بھارتی آئین کا آرٹیکل 28(1) واضح طور پر کہتا ہے کہ کسی بھی تعلیمی ادارے میں کوئی مذہبی تعلیم فراہم نہیں کی جائے گی جو ریاست کی طرف سے مکمل طور پر مالی امداد یا امداد سے چلتی ہے۔ یہ ہندوستان کی سیکولر فطرت کی حفاظت اور تمام مذاہب کے یکساں احترام کو یقینی بنانے کے لیے ہے۔
انہوں نے مزید کہا، "طالب علموں کو دعائیہ مجلسوں کے دوران گیتا کے شلوک پڑھنے کے لیے کہنا اس آئینی اصول کو توڑتا ہے اور سرکاری اسکولوں میں سیکولر تعلیمی نظام کو خطرہ ہے۔ ہمارے اسکولوں میں بہت سے مذاہب، ذاتوں اور برادریوں سے تعلق رکھنے والے طالب علم رہتے ہیں۔ کسی ایک مذہب کے متن کو زبردستی پڑھانے سے دوسروں کو تکلیف ہوتی ہے اور امتیازی سلوک ہوتا ہے، جو سماجی ہم آہنگی اور جامع تعلیم کے خلاف ہے۔
دوسری طرف ریاست کے ڈائرکٹر آف ایجوکیشن ڈاکٹر مکل کمار ستی نے حکومت کا نقطہ نظر بیان کیا۔ انہوں نے کہا، "ہم نے تمام چیف ایجوکیشن آفیسرز کو ہدایت دی ہے کہ طلباء کو چاہیے کہ وہ ہر روز دعائیہ مجلس کے دوران کم از کم ایک شلوک اس کے معنی کے ساتھ پڑھیں۔ ہر ہفتے نوٹس بورڈز پر ‘ہفتہ کا شلوک’ آویزاں کیا جائے گا، اور طلبہ اس پر عمل کریں گے، اس کے معنی پر بحث کریں گے اور رائے دیں گے۔
ڈاکٹر ستی نے وضاحت کی کہ اساتذہ طلباء کو یہ سمجھنے میں بھی مدد کریں گے کہ سریمد بھگو د گیتا کی تعلیمات کس طرح اچھی اقدار کو فروغ دیتی ہیں، رویے کو بہتر کرتی ہیں، قیادت کو فروغ دیتی ہیں، فیصلہ سازی کو بڑھاتی ہیں، جذباتی توازن کو فروغ دیتی ہیں، اور سائنسی سوچ کی حوصلہ افزائی کرتی ہیں۔