آپ ہندو ہیں یا مسلمان؟ مذہبی شناخت کی بنیاد پر مسلم انجینئر کو ملازمت سے انکار

نئی دہلی ،08 ستمبر :۔

آسام کے سلچر سے تعلق رکھنے والے ایک نوجوان مسلم مکینیکل انجینئر نے الزام  عائد کیا ہے کہ اسے بھرتی کے عمل کے دوران اس وقت شدید جھٹکا لگا  جب کمپنی کے ایچ آر نے اس  سے براہ راست اس کے مذہب کے بارے میں پوچھا۔اور شناخت ظاہر ہونے پر اس سے ملازمت دینے سے انکار کر دیا گیا ۔

رپورٹ کے مطابق شمیم باربھویا، جنہوں نے درحقیقت ملازمت کے لیے درخواست دی تھی، نے کہا کہ ایچ آر نے ابتدائی طور پر انہیں 18,000 ماہانہ تنخواہ کی پیشکش کی اور مہینے کی 6 تاریخ کے بعد جوائن کرنے کو کہا۔ انہوں نے بتایا کہ انہوں نے مجھے جوائن کرنے کے لیے دفتر آنے کو کہا، لیکن مجھے ان کے دعووں پر شک ہوا کیونکہ انہوں نے  مجھے جوائننگ لیٹر نہیں دیا  تھا۔ جب میں نے اس کے بارے میں پوچھا تو میرا سوال  ٹال دیا گیا۔

ان کے مطابق، اصل جھٹکا تب لگا جب بھرتی کرنے والے نے پوچھا، ’’تم ہندو ہو یا مسلمان؟‘‘ شمیم نے کہا، "جس لمحے میں نے جواب دیا، مجھے بتایا گیا کہ کوئی جگہ خالی نہیں ہے، حالانکہ اس سے پہلے انہوں نے میری پروفائل میں دلچسپی ظاہر کی تھی۔ اس سے مجھے بہت تکلیف ہوئی۔

دی آبزرور پوسٹ  کی رپورٹ کے مطابق شمیم نے بتایا کہ ایک نوکری کے متلاشی کے طور پر، میں نے ہمیشہ یقین کیا کہ مواقع میرٹ اور محنت پر مبنی ہوتے ہیں۔ لیکن اہلیت کے بجائے مذہب پر فیصلہ کرنے سے مجھے یہ احساس ہوا کہ تعصب اب بھی بہت سے مستحق امیدواروں کے لیے رکاوٹ ہے۔

درحقیقت سلچر میں بہارا ریلوے اسٹیشن یارڈ میں ایک یونٹ میں مکینیکل انجینئر  کے لیے مستقل ملازمت کی تفصیل میں "غیر معمولی حالات” درج ہیں جیسے، "امیدوار کا پیدائشی طور پر بنگالی اور پیدائشی طور پر ہندوستانی ہونا چاہیے” اور تین بڑی زبانوں کا علم ہونا چاہیے۔

یہ معاملہ ایک ایسے وقت میں سامنے آیا ہے جب پیشہ ورانہ اور تعلیمی مقامات پر مسلمان اپنی شناخت کے حوالے سے ہراساں کیے جانے کی اطلاع دیتے رہتے ہیں۔ دسمبر 2024 میں احمد آباد میں نرسنگ کے ایک مسلمان طالب علم کو امتحان سے پہلے داڑھی منڈوانے کو کہا گیا۔ اس سال کے شروع میں کولکاتہ میں اسسٹنٹ پروفیسر سنجیدہ قادر نے حجاب پہننے پر ہراساں کیے جانے کا الزام لگا کر استعفیٰ دے دیا تھا۔ اسی طرح، جولائی 2025 میں، بنگلور کے ایک نرسنگ کالج میں کشمیری طالبات کو مبینہ طور پر حجاب یا برقعہ میں کلاسوں میں جانے سے روک دیا گیا تھا۔