آل انڈیا مسلم پرسنل لا بورڈ کا’وقف بچاؤ مہم‘کے دوسرے مرحلے کا آغاز
11 اکتوبر کو دہلی کے جنتر منتر پر پر امن احتجاج ،16 نومبر کو دہلی کے رام لیلا میدان میں زبر دست احتجاج اور راشٹرپتی بھون تک وقف مارچ کا اعلان
دعوت ویب ڈیسک
نئی دہلی،19 ستمبر :۔
حالیہ دنوں میں سپریم کورٹ کی جانب سے متنازعہ وقف ترمیمی قانون سے متعلق سماعت کے دوران متعدد شقوں پر روک لگائی ہے لیکن مجموعی طور پر وقف ایکٹ پر روک لگانے سے سپریم کورٹ نے انکار کر دیا تھا۔سپریم کورٹ کے اس عبوری فیصلے کو جہاں متعدد تنظیموں اور شخصیات نے معمولی راحت قرار دیا تھا وہیں وقف ترمیمی قانون کے خلاف سر گرم مہم چلانے والے آل انڈیا مسلم پرسنل لا بورڈ (اے آئی ایم پی ایل بی) نے اسے مایوس کن قرار دیا تھا اور اپنی وقف بچاؤ مہم کو تیز کرنے کا اعلان کیا تھا ۔ اسی سلسلے میں آج سےمسلم پرسنل لا بورڈ نے اپنی ملک گیر ‘وقف بچاؤ مہم’ کو تیز کرنے کا اعلان کیا ہے۔
مہم کے تحت ملک بھر میں نماز جمعہ سے قبل خصوصی خطبہ کی ہدایت جاری کی گئی ۔ یہ خطبات وقف کی اہمیت اور ترمیم سے پیدا ہونے والے خدشات پر روشنی پر مبنی ہوگا ۔ نماز کے بعد وقف املاک کے تحفظ کے لیے دعاؤں کی بھی خصوصی اہتمام کی اپیل کی گئی ہے۔
واضح رہے کہ آئندہ 3 اکتوبر کو، مسلم پرسنل لا بورڈ نے مسلمانوں سے اپیل کی ہے کہ وہ میڈیکل اسٹور کے علاوہ صبح 8 بجے سے دوپہر 2 بجے تک اپنے کاروبار، دفاتر اور ادارے رضاکارانہ طور پر بند رکھیں۔ 11 اکتوبر کو دہلی کے جنتر منتر پر پرامن احتجاج کیا جائے گا، جس کے بعد رضاکارانہ گرفتاریاں دی جائیں گی۔
مہم میں "ہم وقف ترمیمی ایکٹ کو قبول نہیں کرتے” کے عنوان سے ایک کثیر لسانی کتابچے کی اشاعت بھی شامل ہے۔ بڑے شہروں میں پریس کانفرنسوں کا اہتمام کیا جائے گا، اور سول سوسائٹی کے ارکان کے ساتھ گول میز مباحثے ہوں گے۔ تمام کمیونٹیز میں مذہبی اوقاف کے تحفظ کی اہمیت کو اجاگر کرنے کے لیے بین المذاہب میٹنگز بھی منعقد ہوں گی۔
16 نومبر کو دہلی کے رام لیلا میدان میں ایک بڑا احتجاج طے کیا گیا ہے، اس کے بعد راشٹرپتی بھون تک ’وقف مارچ‘ کیا جائے گا۔ ریاستی سطح کے مارچ کا اختتام میمورنڈم کے ساتھ گورنر ہاؤسز پر ہوگا۔یکم سے 8 نومبر تک ملک بھر میں دستاویزات کی تصدیق کی مہم شروع کی جائے گی۔ خصوصی وقف ڈیسک قائم کیے جائیں گے جہاں نگراں جائیداد کے کاغذات جائزہ لیا جائے گا ۔