آسام : 4 سالوں میں اشتہارات پر 372 کروڑ روپے خرچ  

نئی دہلی ،13 مارچ :۔

مرکز میں مودی کی قیادت میں بننے والی بی جے پی حکومت شروع سے ہی اشتہارات پر جم کر محنت کر رہی ہے۔کوئی بھی الیکشن ہو یا پارٹی پروگرام بی جے پی حکومت پیسے پانی کی طرح بہا کر اس کا اشتہار کرتی ہے اور ہر وہ طریقہ اختیار کیا جاتا ہے جس کے ذریعہ لائم لائٹ میں رہے۔اس معاملے میں اب بی جے پی کی قیادت والی ریاستی حکومتیں بھی پیچھے نہیں ہیں  مختلف ریاستوں کی بی جے پی حکومتیں، سبھی اشتہارات پر خوب خرچ کررہی ہیں۔ اس سلسلے میں جب کانگریس رکن اسمبلی عبدالباطن کھانڈاکر نے آسام کی ہیمنتا بسوا سرما حکومت سے ریاستی اسمبلی میں سوال کیا تو معلوم ہوا کہ گزشتہ 4 مالی سالوں میں 372 کروڑ روپے سے زیادہ اشتہارات پر خرچ ہو چکے ہیں۔ ریاستی وزیر برائے اطلاعات و عوامی رابطہ پیوش ہزاریکا نے یہ جانکاری 12 مارچ کو اسمبلی میں دی ہے۔

پیوش ہزاریکا نے کہا کہ 2016 سے 2021 تک آسام کے وزیر اعلیٰ رہے سربانند سونووال کی قیادت والی ریاستی حکومت نے 5 مالی سالوں میں اشتہارات پر 12.6 کروڑ روپے خرچ کیے تھے۔ اس کے بعد ہیمنتا بسوا سرما حکومت نے گزشتہ 4 مالی سالوں میں مختلف میڈیا اداروں کو اشتہارات دینے پر تقریباً 372 کروڑ روپے خرچ کیے۔

کانگریس رکن اسمبلی عبدالباطن کھانڈاکر کے ذریعہ پوچھے گئے سوال کے تحریری جواب میں ہزاریکا نے بتایا کہ موجودہ بی جے پی حکومت نے 22-2021 سے گزشتہ 4 مالی سالوں کے دوران پرنٹ، الیکٹرانک اور آؤٹ ڈور میڈیا میں اشتہارات پر مجموعی طور سے 372.33 کروڑ روپے خرچ کیے ہیں۔

واضح رہے کہ  ہیمنتا بسوا سرما نے مئی 2021 میں بی جے پی کی قیادت والی دوسری آسام حکومت کے وزیر اعلیٰ کی شکل میں ذمہ داری سنبھالی تھی۔ بی جے پی کی دونوں مدت کار کا مشترکہ طور پر سالانہ اعداد و شمار بھی ظاہر کیا گیا ہے۔ اس سے پتہ چلا ہے کہ 21-2020 مالی سال میں سونووال حکومت نے 30.24 کروڑ روپے خرچ کیے تھے، جبکہ ہیمنتا سرما کی طرف سے ریاست میں این ڈی اے حکومت کی دوسری مدت کار میں عہدہ سنبھالنے کے بعد اگلے مالی سال یعنی 22-2021 میں 72.83 کروڑ روپے خرچ کیے گئے۔

آزاد رکن اسمبلی اکھل گگوئی نے بھی حکومت سے اس معاملے میں ایک سوال کیا۔ انھوں نے 16-2015 مالی سال میں اشتہارات پر ہوئے خرچ کی جانکاری مانگی۔ جواب مین پیوش ہزاریکا نے کہا کہ آسام حکومت نے 16-2015 میں اشتہارات پر 18.58 کروڑ روپے خرچ کیے تھے، جو سابق وزیر اعلیٰ ترون گگوئی کی مدت کار کا آخری مالی سال تھا۔ اس کے بعد بی جے پی کی حکومت آئی اور سونووال نے ان کی جگہ لی تھی۔ اگلے ہی سال سونووال حکومت میں اشتہارات پر خرچ بڑھا کر 26.88 کروڑ روپے ہو گیا۔