آسام: گولاگھاٹ ضلع میں بنگالی مسلم خاندانوں کی بے دخلی پر روک   

نئی دہلی ،23 اگست :۔

آسام کے گولاگھاٹ ضلع کے اوریم گھاٹ اور قریبی دیہاتوں میں ہنتا بسوا سرما حکومت کی ظلم و زیادتی کا شکار بنگالی مسلمانوں کو سپریم کورٹ نے راحت دی ہے ۔سپریم کورٹ نے متاثرین کی عرضی پر سماعت کرتے ہوئے جمعہ کو بے دخلی اور مسماری مہم پر جمود برقرار رکھنے کا حکم دیا۔اس حکم سے  2,000 سے زیادہ بنگالی مسلم خاندانوں کو عارضی ریلیف فراہم کیا گیا جو اس علاقے میں دہائیوں سے آباد  ہیں مگر موجودہ بی جے پی حکومت کے عتاب کا شکار ہو کر اپنے گھر بار اور رہائش سے محرو م ہو گئے ہیں۔

رپورٹ کے مطابق جسٹس پی ایس نرسمہا اور اتل ایس چندورکر پر مشتمل بنچ نے ایک درخواست کی سماعت کرتے ہوئے عبوری حکم جاری کیا جس میں گوہاٹی ہائی کورٹ کے متاثرہ رہائشیوں کو تحفظ دینے سے انکار کو چیلنج کیا گیا تھا۔ ہائی کورٹ کی جانب سے ان کی رٹ اپیلوں کو مسترد کرنے اور ریاستی حکومت کے بے دخلی کے اقدامات کو برقرار رکھنے کے بعد درخواست گزاروں نے سپریم کورٹ سے رجوع کیا۔

اہل خانہ نے عدالت کے سامنے دلیل دی کہ وہ طویل عرصے سے آباد رہائشی ہیں جو 70 سال سے زائد عرصے سے زمین پر بلا روک ٹوک قبضے میں ہیں۔ انہوں نے قانونی شناخت کے ثبوت کے طور پر ریاست کی طرف سے جاری کردہ دستاویزات جیسے راشن کارڈ، بجلی کے کنکشن اور انتخابی فہرستوں میں شمولیت کی طرف اشارہ کیا۔ ان کے مطابق، بے دخلی منصفانہ معاوضے کے حق اور حصول اراضی، بحالی اور آباد کاری ایکٹ، 2013، اور آسام رولز 2015 کی شقوں کی خلاف ورزی کرتی ہے۔

تاہم حکام نے آسام فاریسٹ ریگولیشن، 1891 کا حوالہ دیتے ہوئے اس آپریشن کو درست قرار دیتے ہوئے دعویٰ کیا کہ یہ گائوں ڈویانگ اور جنوبی نمبر کے ریزرو جنگلات میں آتے ہیں۔ جولائی 2025 میں جاری کیے گئے بے دخلی کے نوٹس نے رہائشیوں کو خالی ہونے کے لیے صرف سات دن کا وقت دیا تھا۔

یہ بڑے پیمانے پر بے دخلی آسام کی سب سے اعلیٰ پروفائل کارروائیوں میں سے ایک کا حصہ ہے، جس کا مقصد اوریم گھاٹ علاقے میں تقریباً 15,000 بیگھہ (4,900 ایکڑ) اراضی کو خالی کرنا ہے۔ جون 2025 سے، حکومت نے چار اضلاع میں پانچ الگ الگ مہموں میں 3,500 سے زیادہ خاندانوں کو بے دخل کیا ہے، جس سے تقریباً 50,000 افراد بے گھر ہوئے ہیں۔