آئین ہی سپریم ہے،عدالتی نظرثانی آئینی عمل

نئی دہلی،09 مئی :۔

گزشتہ دنوں جب سپریم کورٹ نے متنازعہ وقف ترمیی قانون پر سماعت کے دوران تبصرہ کرتے ہوئے فوری نفاذ پر روک لگا دی تو ملک میں دائیں بازو کی حامل جماعتوں نے سپریم کورٹ کے ہی خلاف مورچہ کھول دیا اور ناقابل اعتراض تبصرے کئے گئے ،خود حکومت میں بیٹھے اہم عہدیدارن نے بھی ایسے تبصرے کئے جس پر سپریم کورٹ کو سنجیدگی سے غور کرنا پڑا۔نائب وزیر اعلیٰ نے بھی عدلیہ اور مقننہ اور عاملہ کی تفصیل بیان کرتے ہوئے پارلیمان کو ہی اعلیٰ اتھارٹی قرار دیا تھا ۔اس تنازعہ کے درمیان اورایک ایسے وقت میں جب پارلیمانی بالادستی کے کھوکھلے دعوے کیے جا رہے ہیں، سپریم کورٹ نے ایک اہم یاد دہانی جاری کی ہے کہ آئین ہی سپریم ہے۔

عدالت نے اس بات کا بھی اعادہ کیا کہ عدالتی نظرثانی ایک ایسا کام ہے جو  آئین کی طرف سے ہی  عدلیہ کو تفویض کیا گیا  ہے، اور اس لیے جب عدالتیں  کسی قانون کی  آئینی حیثیت کو پرکھتی  ہیں، تو وہ آئین کے دائرے میں رہ کر کام کر رہی ہوتی  ہیں۔

لائیو لاء کی رپورٹ کے مطابق  چیف جسٹس سنجیو کھنہ اور جسٹس سنجے کمار کی ایک ڈویژن بنچ نے یہ مشاہدات ایک حکم میں کہے جو نائب صدر جگدیپ دھنکھڑ کی طرف سے عدلیہ کے خلاف کیے گئے سخت حملے کے جواب میں تھا۔ بلوں پر عمل کرنے کے لیے صدر اور گورنروں کے لیے ڈیڈ لائن مقرر کرنے پر سپریم کورٹ پر تنقید کرتے ہوئے، دھنکھڑ نے کہا تھا کہ عدلیہ "سپر پارلیمنٹ” بننے کی کوشش کر رہی ہے۔ وقف ترمیمی ایکٹ کو چیلنج کرنے والی درخواستوں میں سپریم کورٹ کی مداخلت کے بعد، دھنکھڑ نے کہا تھاکہ "پارلیمنٹ سپریم ہے” اور "پارلیمنٹ سے اوپر کسی اتھارٹی کا آئین میں کوئی تصور نہیں ہے”۔ان دعوؤں کو مسترد کرتے ہوئے عدالت نے اپنے حکم میں کہا: جمہوریت میں ریاست کی ہر شاخ، خواہ وہ مقننہ ہو، ایگزیکٹو ہو یا عدلیہ، خاص طور پر آئینی جمہوریت میں، آئین کے فریم ورک کے اندر کام کرتی ہے، یہ آئین ہے جو ہم سب سے بالاتر ہے، یہ آئین ہی ہے جو اختیارات پر حدود اور پابندیاں عائد کرتا ہے یا تینوں اختیارات پر نظرثانی کی گئی ہے جو اختیارات کے دائرہ اختیار میں ہیں۔اس لیے جب  آئینی عدالتیں  کسی قانون یا انصاف کی عدالتی تشریح و نظر ثانی کے اپنے اختیار کو استعمال کرتی ہیں تووہ آئین کے ڈھانچہ کے تحت ہی کام کرتی ہیں۔

یہ اختیار آئین کے بنانے والوں نے آرٹیکل 32 اور 226 کے ذریعے واضح الفاظ میں دیا ہے اور یہ چیک اینڈ بیلنس کے نظام پر منحصر ہے۔ ہمارا ماننا ہے کہ عام لوگ حکومت کے تینوں اداروں اور ان کے مختلف کرداروں کے درمیان تعلق سے واقف ہیں۔ وہ عدلیہ کے کام اور کردار سے واقف ہیں، جو کہ عدالتی طور پر دوسری شاخوں کے اعمال کا جائزہ لینا اور اس بات کا جائزہ لینا ہے کہ آیا دوسری شاخیں آئین کے تحت قانونی طور پر کام کر رہی ہیں۔