یوپی: مسلم ،دلت اور پسماندہ نے انڈیا اتحاد کو اور اعلیٰ ذات نے بی جے پی کو ووٹ دیا

نئی دہلی،09جون :۔
حالیہ لوک سبھا انتخابات کے دوران بی جے پی کے لئے اتر پردی کے نتائج انتہائی حیران کن تھے،بی جے پی نے یوگی کی قیادت میں ایسا تصور بھی نہیں کیا تھا کہ بی جے پی کی ہندو اکثریت والی سیٹوں خاص طور پر ایودھیا اور اس کے آس پاس کی 23 سیٹوں پر ہزیمت کا سامنا کرنا پڑے گا لیکن نتائج نے ہر سطح پر بی جے پی کو اپنا جائزہ لینے پر مجبور کر دیا ہے۔نتیجوں سے یہ بات سامنے آئی ہے کہ بی جے پی کو اعلیٰ ذات کے لوگوں نے یکطرفہ طور پر ووٹ دیا جبکہ پسماندہ ،دلت اور مسلمان رائے دہندگان نے انڈیا اتحاد کا رخ کیا ۔
رپورٹ کے مطابق لوک نیتی-سی ایس ڈی ایس پوسٹ پول سروے کے اعداد و شمار سے پتہ چلتا ہے کہ اتر پردیش میں عام/اونچی ذات کے برہمن، راجپوت، اور ویشیہ رائے دہندگان نے بڑی حد تک بھارتیہ جنتا پارٹی (بی جے پی) کی حمایت کی، جبکہ دیگر پسماندہ طبقات (او بی سی)، درج فہرست ذاتیں (ایس سی) اور بھارت کی سب سے زیادہ آبادی والی ریاست اتر پردیش میں مسلم ووٹروں نے انڈیا اتحاد کو ترجیح دی۔انڈیا اتحاد نے یوپی میں 43 نشستیں حاصل کیں جبکہ ہندوتوا پارٹی 75 میں سے صرف 33 نشستیں جیت سکی، اور اس کے اتحادیوں نے صرف ایک جیتی۔ کانگریس نے 17 میں سے چھ سیٹیں جیتیں۔
لوک نیتی-سی ایس ڈی ایس پوسٹ پول سروے کے اعداد و شمار سے ظاہر ہوتا ہے کہ ہر 10 میں سے نو (89%) راجپوت ووٹروں نے بی جے پی کی حمایت کی جبکہ یادو اور مسلم ووٹر غیر جاٹو دلت ووٹروں کے ایک بڑے حصے کے ساتھ انڈیا اتحاد کے حق میں متحد ہو گئے۔
سروے کے نتائج سے پتہ چلتا ہے کہ بہوجن سماج پارٹی نے تمام سماجی فرقوں کی حمایت کھو دی ہے، بشمول جاٹو، اس کی اہم حمایتی بھی ساتھ چھوڑکر چلے گئے۔سب سے اہم عنصر جو بی جے پی کی خراب کارکردگی اور سماج وادی پارٹی کی شاندار کارکردگی کے لیے ذمہ دار تھا وہ یہ تھا کہ ’’مودی جادو‘‘ اتر پردیش میں نمایاں طور پر ختم ہوتا ہوا نظر آیا، پوسٹ پول سروے کے نتائج نے یہ ظاہر کیا۔
سروے کے نتائج کے مطابق، زعفرانی پارٹی، جو اپنی سوشل انجینئرنگ کے لیے جانی جاتی ہے، اکھلیش یادو کے ‘پی ڈی اے’ کے متبادل سوشل انجینئرنگ فارمولے سے شکست کھاگئی، جس کے تحت اس نے زیادہ تر (پسماندہ برادریوں) اور دلتوں اور چند یادو اور مسلمانوں کو ٹکٹیں تقسیم کیں۔
لوک نیتی-سی ایس ڈی ایس پوسٹ پول سروے کے اعداد و شمار سے پتہ چلتا ہے کہ او بی سی اور دلتوں میں یہ خدشہ عمومی طور پر نظر آیا کہ بی جے پی آئین کو بدل دے گی جیسا کہ اس کے متعدد رہنماؤں نے بیانات دیئے تھے۔ زعفرانی پارٹی اپوزیشن کے اس بیانیہ کا مقابلہ نہیں کر سکی کہ وہ آئین کو تبدیل کرنا چاہتی ہے اور او بی سی اور ایس سی/ایس ٹی کے ریزرویشن کو ختم کرنا چاہتی ہے۔