نئی دہلی ،28 ستمبر :۔
ایس آئی آر کے خلاف کانگریس کی ووٹ چوری مہم کا سلسلہ جاری ہے ۔راہل گاندھی کے ذریعہ سیدھے طور پر الیکشن کمیشن پر دھاندھلی کے الزامات نے اس مسئلے کو عام آدمی تک پہنچا دیا ہے ۔یہی وجہ ہے کہ ووٹ چوری پر باتیں ہونے لگی ہیں جو بی جے پی کے لئے مشکلات پیدا ہو رہی ہیں۔ اسی سلسلے میں گزشتہ روز ہفتہ کو وزیر اعظم نریندر مودی کے پارلیمانی حلقہ وارانسی میں ووٹر ادھیکار سمیلن پروگرام کا انعقاد کیا گیا تھا مگر اس پروگرام کو مقامی پولیس نے یہ کہہ کر روک دیا کہ اس کی اجازت نہیں لی گئی ہے ۔
رپورٹ کے مطابق ہفتہ کی دوپہر اس وقت ہنگامہ برپا ہو گیا جب کانگریس کی جانب سے ووٹ چوری کے سلسلے میں منعقد پروگرام کو پولیس نے رکوا دیا۔رپورٹ کے مطابق 2 بجے سول سوسائٹی کی جانب سے منعقد ہونے والے ’ووٹر ادھیکار سمیلن‘ کو پولیس نے روک دیا۔ یہ پروگرام میداگن کے ’پراڑکر اسمرتی بھون‘ میں ہونا تھا۔ مبینہ ’ووٹ چوری‘ کے خلاف یہ ’ووٹر ادھیکار سمیلن‘ منعقد کیا جانا تھا۔ اس انعقاد کا مقصد حال ہی میں بہار میں ہوئے اسپیشل انٹینسیو ریوژن (ایس آئی آر) پر بھی تبادلہ خیال کرنا تھا، جس پر کئی تنظیم اور سول سوسائٹی گروپ سوال اٹھا رہے ہیں۔
پروگرام کے مقام پر پہنچے لوگوں نے الزام عائد کیا کہ پولیس نے پروگرام کو یہ کہتے ہوئے رکوا دیا کہ اس کے لیے تھانے سے اجازت نہیں لی گئی تھی۔ اس دوران پولیس نے ’پراڑکر اسمرتی بھون‘ کو بند کرا دیا اور باہر بیریکیڈنگ لگا دی۔ پروگرام کے مقام پر موجود ’ڈیموکریٹک چرخہ‘ کے سی ای او عامر عباس نے کہا کہ موقع پر موجود ایس آئی نے انہیں کہا کہ اجازت نہ ہونے کی وجہ سے پروگرام کو روک دیا گیا ہے۔ لیکن بعد میں جب عامر عباس نے ڈی ایس پی ڈاکٹر اتل ترپاٹھی سے بات کی تو ڈی ایس پی نے دعویٰ کیا کہ بھون کے مالک نے خود ہی اپنی خواہش سے پرورگرام کو منسوخ کیا اور پولیس کو بلوایا۔ یہاں پر دونوں افسران کے بیانات میں واضح طور پر تضاد نظر آ رہا ہے۔ حالانکہ ’پراڑکر اسمرتی بھون‘ کے مالکوں اور پروگرام کے منتظمین نے اس معاملہ میں کوئی آفیشیل تبصرہ کرنے سے انکار کر دیا ہے۔
اس پروگرام کو کانگریس کی قومی ترجمان سپریہ شرینیت خطاب کرنے والی تھیں۔ اس کے علاہ ودیا آشرم کے بانی سنیل سہسر بدھے اور ’پپلس یونین فار سول لبرٹیز‘ (پی یو سی ایل) کے بہار جنرل سیکرٹری سرفراز بھی اس میں شامل ہونے والے تھے۔ لیکن پولیس کی کارروائی کے سبب یہ پروگرام منعقد نہیں ہو پایا اور موقع پر بڑی تعداد میں پولیس فورس تعینات کر لوگوں کو وہاں سے ہٹا دیا گیا۔