نئی دہلی، نومبر 23: وزیر اعظم اور نیپالی کانگریس کے صدر شیر بہادر دیوبا بدھ کے روز اپنے آبائی ضلع دھنکوٹا سے مسلسل ساتویں مرتبہ منتخب ہوئے۔
مسٹر شیر بہادر دیوبا نے اپنے حریف ساگر ڈھکال کو 12,492 ووٹوں سے شکست دی۔ مسٹر دیوبا کو 25,534 ووٹ ملے جبکہ مسٹر ڈھکال کو 13042 ووٹ ملے۔
حکمراں نیپالی کانگریس کی زیر قیادت والا اتحاد نیپال کے پارلیمانی انتخابات میں دھیرے دھیرے اکثریت حاصل کرنے کی طرف بڑھ رہا ہے۔ ووٹوں کی گنتی کے تازہ ترین رجحانات کے مطابق حکمران اتحاد 75 سیٹوں پر آگے ہے۔ اس کے ساتھ ہی، سابق وزیر اعظم کے پی شرما اولی کی قیادت میں مرکزی اپوزیشن کمیونسٹ پارٹی آف نیپال (CPN-UML) نے تین سیٹوں پر کامیابی حاصل کی ہے اور ان کی پارٹی 38 سیٹوں پر آگے چل رہی ہے۔
نیپالی کانگریس نے چھ سیٹیں جیتی ہیں اور وہ 46 پر آگے ہے۔ سابق وزیر اعظم پشپ کمل دہل کی اتحادی پارٹی سی پی این-ایم سی 17 سیٹوں پر آگے ہے، جبکہ سی پی این-یو ایس اور ڈیموکریٹک سوشلسٹ پارٹی دو سیٹوں پر آگے ہے۔
نیپال کے الیکشن کمیشن کے مطابق 20 نومبر کو ہونے والے پارلیمانی اور صوبائی انتخابات میں تقریباً 61 فیصد ووٹ ڈالے گئے۔ چیف الیکشن کمشنر دنیش کمار تھپلیہ نے کہا کہ یہ ووٹنگ فیصد الیکشن کمیشن کی توقعات سے بہت کم ہے۔ انہوں نے کہا کہ تشدد کے چند واقعات کو چھوڑ کر پورے ملک میں انتخابات پرامن طریقے سے ہوئے۔
خیال رہے کہ نیپال میں وفاقی پارلیمان کی 275 اور سات صوبائی اسمبلیوں کی 550 نشستوں کے لیے انتخابات ہو ئے ہیں۔