مہاراشٹر کے اسکول 4 اکتوبر سے دوبارہ کھلیں گے، عبادت گاہوں کو بھی 7 اکتوبر سے کھولنے کی اجازت
نئی دہلی، ستمبر 25: مہاراشٹر حکومت نے جمعہ کو اعلان کیا کہ ریاست بھر میں اسکول 4 اکتوبر سے دوبارہ شروع ہوں گے اور عبادت گاہیں 7 اکتوبر سے دوبارہ کھل جائیں گی۔
اسکولوں کو دیہی علاقوں میں کلاس 5 سے 12 کے لیے فزیکل کلاسز شروع کرنے کی اجازت ہوگی اور ریاست کے باقی مقامات 8 سے 12 کلاس کے لیے ادارے کھول سکتے ہیں۔
دی انڈین ایکسپریس کی رپورٹ کے مطابق تمام تعلیمی بورڈز کے سرکاری اور نجی اسکولوں کو نئے قوانین کے مطابق دوبارہ کھولنے کی اجازت ہوگی۔ رہائشی، کنڈرگارٹن اور پری اسکولوں کو دوبارہ کھولنے کی اجازت نہیں ہوگی۔
17 اگست سے ریاستی حکومت نے ان علاقوں میں اسکولوں کو دوبارہ شروع کرنے کی اجازت دی تھی جہاں کووڈ 19 کا پھیلاؤ کم تھا۔ لیکن حکومت نے کوئی حد مقرر نہیں کی تھی کہ جس کے نیچے کورونا وائرس کے کیسز کو ’’کم‘‘ سمجھا جائے گا۔
تاہم اس نے میونسپل حکام اور ضلع کلکٹروں کو شہری اور دیہی علاقوں کے لیے فیصلہ لینے کا اختیار دیا تھا۔
4 اکتوبر سے ریاست کے تمام حصوں میں اسکول دوبارہ کھولنے کی اجازت دی جائے گی۔
ریاست کی اسکول ایجوکیشن وزیر ورشا گائیکواڈ نے کہا کہ طلبا پر جسمانی کلاسوں میں شرکت کی کوئی مجبوری نہیں ہوگی۔ انھوں نے کہا ’’اگر وہ شرکت کرنا چاہتے ہیں تو والدین کی رضامندی ضروری ہوگی۔‘‘
ریاستی حکومت نے اسکولوں کو دوبارہ کھولنے کے لیے معیاری آپریٹنگ طریقہ کار جاری کیا ہے۔ ہدایات میں کہا گیا ہے کہ تمام تدریسی اور غیر تدریسی عملے کو اسکولوں کو دوبارہ کھولنے سے کم از کم 48 گھنٹے قبل کورونا وائرس کے لیے RT-PCR ٹیسٹ کرانا چاہیے۔
ایس او پیز یہ بھی نوٹ کرتے ہیں کہ مقامی انتظامیہ اس بات کو یقینی بنائے کہ اسکولوں میں تھرمامیٹر، سینیٹائزر، صابن اور پانی موجود ہو۔
تمام تدریسی اور غیر تدریسی عملے کو سکولوں میں جانے کے لیے ویکسین لگانی ہوگی۔
مزید یہ کہ مہاراشٹر حکومت نے اسکولوں سے کہا ہے کہ اگر ممکن ہو تو اپنے احاطے میں ہیلتھ کلینک قائم کریں۔ اس نے یہ بھی ہدایت کی کہ طلبا کے درجہ حرارت کو مستقل بنیادوں پر چیک کرنے کے انتظامات کیے جائیں۔
ہدایات میں کہا گیا ہے کہ اساتذہ طلبا کو اسکولوں میں چلنے کی ترغیب دیں۔ اگر طالب علم سکول بسیں استعمال کرتے ہیں تو ہر سیٹ پر صرف ایک طالب علم کی اجازت ہونی چاہیے۔
ریاستی حکومت نے مزید کہا ہے کہ موجودہ صورت حال میں کھیلوں کی کسی بھی سرگرمی کی اجازت نہیں ہونی چاہیے۔
ہدایات میں کہا گیا ہے ’’ایک بار جب کورونا وائرس سے متعلقہ صورت حال معمول پر آجائے تو کچھ کھیلوں کی سرگرمیاں شروع کی جاسکتی ہیں۔‘‘
دریں اثنا وزیراعلیٰ کے دفتر نے ٹویٹر پر اعلان کیا کہ تمام عبادت گاہیں 7 اکتوبر کو نوراتری کے تہوار کے پہلے دن سے دوبارہ کھل جائیں گی اور عقیدت مندوں کووڈ 19 سے متعلقہ پروٹوکول پر عمل کرنے کی ضرورت ہوگی۔
6 ستمبر کو وزیر اعلیٰ ادھو ٹھاکرے نے کہا تھا کہ تہوار بعد میں منائے جا سکتے ہیں ابھی شہریوں کی صحت کو ترجیح دی جانی چاہیے۔
اگست میں مہاراشٹر حکومت نے جنم اشٹمی کے تہوار پر منعقدہ روایتی دہی ہانڈی تقریب کے دوران انسانی اہرام کی تشکیل سمیت تمام عوامی اجتماعات پر پابندی لگا دی تھی۔ ریاست میں بھارتیہ جنتا پارٹی سمیت اپوزیشن جماعتوں نے اس فیصلے کی مخالفت کی تھی اور اسے ’’ہندو مخالف‘‘ قرار دیا تھا۔