مجلس مغربی بنگال اور اتر پردیش میں اسمبلی انتخابات لڑے گی: اسدالدین اویسی

نئی دہلی۔ اپنی جماعت کی عمدہ کارکردگی سے حوصلہ پاکر، آل انڈیا مجلس اتحاد المسلمین کے صدر اسد الدین اویسی نے اعلان کیا ہے کہ ان کی جماعت مغربی بنگال اور اتر پردیش میں آئندہ اسمبلی انتخابات لڑے گی۔ ان کی پارٹی نے 20 نشستوں میں سے بہار میں پانچ نشستوں پر کامیابی حاصل کی۔

اگرچہ اگلی اسمبلی انتخابات مغربی بنگال میں اپریل تا مئی 2021 میں ہونے والے ہیں ، یوپی میں یہ فروری تا مارچ 2022 میں ہوں گے ۔ بہار کے اسمبلی انتخابات کے نتائج کے بعد ، اویسی اور ان کی پارٹی کے پوسٹر مغربی بنگال کے بعض علاقوں میں نظر آنے شروع ہوگئے ہیں۔

ٹی وی چینلوں اور پرنٹ میڈیا کو انٹرویو دیتے ہوئے انہوں نے کہا کہ بہار میں راشٹریہ جنتا دل (آر جے ڈی) حکومت سے مسلمانوں کو کبھی فائدہ نہیں ہوا ،کیونکہ مسلمانوں کی پارٹی میں کوئی ’آزاد‘ سیاسی آواز نہیں ہے۔ جبکہ گزشتہ تمام حکومتوں کے ذریعے نالندہ ، پٹنہ یا دربھنگہ میں تمام اچھے تعلیمی ادارے قائم کیے گئے تھے ، لیکن بڑی تعداد میں مسلم آبادی والے سیمانچل خطے کو نظرانداز کردیا گیا تھا۔ ریاستی خواندگی کی شرح 50 فیصد کے مقابلے میں سیمانچل میں خواندگی کی شرح صرف 37 فیصد ہے۔

ان مسلم رائے دہندگان کے بارے میں جواب دیتے ہوئے ، جنہوں نے پہلے آر جے ڈی اور کانگریس کو ووٹ دیا تھا اور اس بار مجلس کی طرف منتقل ہوگئے ، مسٹر اویسی نے کہا کہ جب آرجے ڈی کے سب سے قدآور لیڈرعبدالباری صدیقی کیوٹی اسمبلی حلقہ میں بی جے پی کے یادو امیدوار سے ہار گئے۔انھوں نے کہا،’’ایسا کیوں ہوا؟ اس لیے کہ مسلمانوں میں یہ احساس موجود ہے کہ یہ شاید یادو برادری نے کیاہے۔‘‘

انہوں نے کہا کہ یادَوُوں نے 2015 بہار انتخابات میں صرف 14 فیصد آبادی والے 57 ایم ایل اے منتخب کیے تھے اور کل آبادی کا 17 فیصد والے مسلمان صرف 24 ایم ایل اے منتخب کرسکے تھے۔ اس بار مسلم ایم ایل اے کی تعداد کم ہوکر 18 ہوگئی۔ ’’یہ ہمارے جمہوری طرز کی پارٹنرشپ کے بارے میں کیابتاتی ہے؟ آپ کے پاس کوئی مسلم آواز نہیں ہے…. آپ نے مان لیا کہ ہم صرف ووٹنگ مشینیں ہیں۔‘‘ انہوں نے دی انڈین ایکسپریس کو بتایا ، ’’اور ہمارا کام آپ کی سیکولرزم کی شکل کو برقرار رکھنا ہے ، جومحض ایک مذاق ہے…‘‘

اپنے فیس بک پوسٹ میں اویسی نے کہا ، ’’کانگریس پہلے کی طرح اب بھی ’ ووٹ کٹوا‘ کا نعرہ لگا رہی ہے۔ انہوں نے پہلے ہی بہارالیکشن میں مجلس کی کامیابی کو اپنی ناکامی کے لیے مورد الزام ٹھہرانا شروع کردیا ہے۔‘‘

انہوں نے کہا کہ ان کی پارٹی نے پانچ نشستوں پر کامیابی حاصل کی ، مہاگٹھ بندھن (ایم جی بی) نے ان 20 نشستوں سے نو اور این ڈی اے نے چھ نشستیں جیتیں جہاں ان کی (اے آئی ایم آئی ایم) پارٹی نے مقابلہ کیا۔ انہوں نے کہا کہ ’’6 نشستوں پر جہاں این ڈی اے نے کامیابی حاصل کی ، جیت کا فرق ہمارے ووٹوں سے زیادہ تھا۔ این ڈی اے ہمارے امیدوار سے قطع نظر جیت جاتا۔ دوسرے لفظوں میں ، ایم جی بی ان نشستوں پر این ڈی اے کو شکست دینے میں ناکام رہی‘‘، انہوں نے کانگریس کے کا جواب دیتے ہوئے کہا۔

’’شیر گھاٹی میں ، آر جے ڈی نے انتہا پسند درگا واہنی سے امیدوار کھڑا کیا تھا لیکن پھر بھی کامیابی حاصل کی۔ وہ انتہاپسندی اور ’ووٹ کاٹنے والوں‘ کے بارے میں کیا کہیں گے؟‘‘ انہوں نے اپنے اوپر لگائے گئے بنیاد پرستی کے الزامات کا جواب دیتے ہوئے پوچھا۔

کانگریس کے ایک رہنما کے اس الزام کا جواب دیتے ہوئے کہ اویسی مسلم برادری کو بنیاد پرست بنا رہے ہیں ، انہوں نے کہا کہ یہ حیرت کی بات ہے کہ مہاراشٹر میں شیو سینا کے ساتھ اتحادی حکومت بنانے میں مدد کرنے والے ان پر فرقہ وارانہ سیاست کرنے کا الزام عائد کررہے ہیں۔

انہوں نے کہا کہ ہندوؤں خصوصا دلت اور او بی سی نے بھی اے آئی ایم ایم کے امیدواروں کو ووٹ دیا۔

مجلس کے صدر نے کہا کہ ان کی پارٹی امیدواروں نے پارٹی کارکنوں کی سخت محنت کی وجہ سے کامیابی حاصل کی۔ انہوں نے کہا کہ جب کانگریس کے رہنما راہل گاندھی چھٹیاں منا رہے تھے تو اس وقت میں نے سیمانچل میں عوامی ریلیاں نکالنے اور لوگوں سے ملنے میں 15 دن گزارے۔ کشن گنج میں راہل گاندھی کے ان بیانات کے بارے میں کہ اویسی نے ہیلی کاپٹر میں سفر کیا ، انہوں نے پوچھا کہ کیا صرف راہل گاندھی کو ہیلی کاپٹر میں سفر کرنے کا حق حاصل ہے؟

کانگریس اور آر جے ڈی کی قیادت پر حملہ کرتے ہوئے انہوں نے کہا کہ دونوں جماعتیں سی اے اے مخالف احتجاج سے خود کو دور کرتی ہیں۔ انہوں نے کہا کہ ان پارٹیوں نے سی اے اے مخالف مظاہرے کی حمایت نہیں کی اور دہلی میں یو اے پی اے کے تحت مسلم نوجوانوں کی گرفتاری کے خلاف یہ بھی نہیں کہا کہ اس سے بی جے پی کو فائدہ ہوگا۔ اے آئی ایم ایم رہنما نے کہا کہ ان جماعتوں کا کوئی نظریہ نہیں ہے اور انھوں نے صرف اپنے مفادات کو پیش نظر رکھا۔
انہوں نے مغربی بنگال میں ممتا بنرجی حکومت پر الزام عائد کیا کہ انہوں نے گزشتہ آٹھ دس مہینوں میں بڑی تعداد میں مسلمانوں کو گرفتار کرایا اور انہیں جیل بھیجا ہے۔